ఓంకార్ మామూలోడు కాడండోయ్

జీ తెలుగు ఛానెల్లో ‘ఆట’ ప్రోగ్రాంతో సూపర్ పాపులరైపోయాడు యాంకర్ ఓంకార్. అతణ్ని అభిమానించేవాళ్ల కంటే వ్యతిరేకించే వాళ్లు ఎక్కువమంది ఉన్నారన్నది వాస్తవం. కానీ ఎంత వ్యతిరేకించినా అతణ్ని అవాయిడ్ చేయలేకపోవడం చాలా మంది బలహీనత. బుల్లితెరపై తన విశ్వరూపం చూపించాక ‘జీనియస్’ సినిమాతో వెండితెర మీదికి దూసుకొచ్చాడు ఓంకార్. కానీ ఆ సినిమా దారుణమైన ఫలితాన్ని మిగిల్చింది. అయినప్పటికీ ఓంకార్ తన ప్రయత్నం ఆపట్లేదు. దర్శకుడిగా మరోసారి తన అదృష్టాన్ని పరీక్షించుకోవడానికి వస్తున్నాడు. దర్శకుడిగా అతడి రెండో సినిమా ‘రాజు గారి గది’. చాలా చిత్రమైన టైటిల్ తో వస్తున్న ఈ సినిమాలో ఓంకార్ తమ్ముడు అశ్విన్ హీరోగా నటిస్తుండటం విశేషం. తేజస్వి మదివాడ కథానాయిక.

దాదాపు ఏడాది కిందటే మొదలైన ఈ సినిమా త్వరలోనే విడుదలకు సిద్ధమవుతోంది. ఐతే ఈ రోజుల్లో సినిమాలకు ప్రమోషనే అత్యంత కీలకమైన విషయం అని ఓంకార్ కు తెలియంది కాదు. తన తమ్ముణ్ని హీరోగా పెట్టి సినిమా తీసి చూడండయ్యా బాబూ అంటే ఎవరికీ పట్టదు. అందుకే డిఫరెంట్ ప్రమోషనల్ స్ట్రాటజీని ఎంచుకున్నాడతను. నిన్న ఈ సినిమాకు సంబంధించి ఓ వెరైటీ ప్రోమో కట్ చేశాడు. చాలామంది సినీ ప్రముఖులతో ఏంటీ ‘రాజుగారి గది’ అని అడిగిస్తూ ప్రోమో కట్ చేశాడు. విక్టరీ వెంకటేష్ - నానిలతో పాటు శ్రీకాంత్ - సందీప్ కిషన్ - నిఖిల్ - మధునందన్ - సుమ - పరుచూరి వెంకటేశ్వరరావు - నాని - రోహిత్ - సంపూ - సాయికుమార్ - సప్తగిరి - జబర్దస్త్ వేణు - నాగశౌర్య - నందిని రెడ్డి - పృథ్వీ - తనీష్ - మంచు లక్ష్మీ ప్రసన్న - రాజేష్ - హర్ష - సత్య - ఛోటా కే నాయుడు - తరుణ్ - ప్రిన్స్ - ప్రభాకర్ - షకలక శంకర్... ఇలా చాలామంది ఈ ప్రమోషనల్ వీడియోలో కనిపించి ‘రాజు గారి గది’ గురించి ఆరా తీశారు. పొలిటీషియన్ అంబటి రాంబాబు సైతం ఇందులో కనిపించారు. ఇంతకీ ఈ ‘రాజు గారి గది’లో ఏముంటుందో తెలియాలంటే వినాయక చవితి వరకు ఆగాలట. ఆ రోజే ఈ సినిమా టీజర్ రిలీజ్ చేయబోతున్నారు. మొత్తానికి ప్రమోషనల్ వీడియోతో బాగానే ఆసక్తి రేపాడు ఓంకార్.