‘గది’ దాటి బయటికి రానంటున్న ఓంకార్

మొన్న దసరా పండక్కి ఏ అంచనాలు లేకుండా వచ్చి సంచలన విజయం సాధించింది ‘రాజు గారి గది’ మూవీ. కంటెంట్ ఉండాలే కానీ.. చిన్న సినిమా ఏ రేంజికి వెళ్లగలదో ఈ సినిమా రుజువు చేసింది. తెలుగులో మరిన్ని చిన్న చిత్రాలు రూపొందడానికి ఈ సినిమా స్ఫూర్తిగా నిలిచింది. ‘జీనియస్’ సినిమాతో వచ్చిన చెడ్డ పేరంతా పోగొట్టుకుని తనేంటో రుజువు చేసుకుున్నాడు ఓంకార్. ఇప్పుడిక తన తర్వాతి సినిమాకు అతను రంగం సిద్ధం చేసుకుంటున్నాడు. ఆ సినిమా మరేదో కాదు.. ‘రాజు గారి గది’కి సీక్వెలే.

ప్రస్తుతం స్క్రిప్ట్ వర్క్ పూర్తి చేసే పనిలో ఉన్న ఓంకార్.. స్వీయ నిర్మాణంలో ఈ చిత్రాన్ని తెరకెక్కించబోతున్నాడు. ‘రాజు గారి గది’ విడుదలకు ముందే ఈ సినిమాకు సీక్వెల్ ఆలోచన ఉందని చెప్పాడు ఓంకార్. ఐతే సినిమా హిట్టయితేనే సీక్వెల్ ఉంటుందని అన్నాడు. అతను అనుకున్నదాని కంటే ‘రాజు గారి గది’ పెద్ద హిట్టవడంతో సీక్వెల్ చేయడానికి ఢోకా లేకపోయింది. ముందు అనుకున్న పాయింటునే మరింత డెవలప్ చేసే పనిలో ఉన్నాడు ఓంకార్. తెలుగులో సీక్వెల్స్ పెద్దగా అచ్చిరావన్న అభిప్రాయం ఉన్నప్పటికీ ఓంకార్ మాత్రం తగ్గట్లేదు. ‘రాజు గారి గది’ తర్వాత అతడికి మంచి ఆఫర్లే ఉన్నప్పటికీ దానికి సీక్వెల్ తీయడానికే రెడీ అవుతుండటం విశేషమే.