సల్మాన్ వ‌ల్ల మెగాస్టార్ తో ఛాన్స్ అలా మిస్

మెగాస్టార్ చిరంజీవి మ‌రో రీమేక్ కు గ్రీన్ సిగ్నెల్ ఇవ్వ‌బోతున్నారా? మ‌రోసారి ఇండియ‌న్ మైఖెల్ జాక్సెన్ ప్ర‌భుదేవాని లైన్ లోకి తెస్తున్నారా? అంటే అవున‌నే టాక్ వినిపిస్తోంది. ఇప్ప‌టికే చిరంజీవి వ‌రుస‌గా రీమేక్ ల‌ను లాక్ చేస్తోన్న సంగ‌తి తెలిసిందే. ప్రస్తుతం కొర‌టాల శివ ద‌ర్శ‌క‌త్వంలో `ఆచార్య‌` లో న‌టిస్తున్నారు. ఇది పూర్తి అవ్వ‌గానే మ‌ల‌యాళం రీమేక్ `లూసీఫ‌ర్` లో న‌టించ‌నున్నారు. అనంత‌రం త‌మిళ్ రీమేక్ `వేదాళం`లో న‌టిస్తారు. ఈ మ‌ధ్య‌లో ఓ స్ట్రెయిట్ సినిమా చేయ‌నున్నారు. బాబి ద‌ర్శ‌క‌త్వంలో ఓ ఫ్యాన్ బేస్డ్ క‌థ‌లో న‌టించ‌నున్నారు. అయితే తాజాగా మెగాస్టార్ బాలీవుడ్ రీమేక్ లో న‌టించ‌బోతున్నారు! అన్న వార్త ఇప్పుడు ఆసక్తిక‌రంగా మారింది.

ఆ క‌థ‌ని ప్ర‌భుదేవా చిరంజీవి వ‌ద్ద‌కు తీసుకొచ్చిన‌ట్లు స‌మాచారం. మ‌రి ఆ బాలీవుడ్ సినిమా ఏంట‌న్న‌ది ఇంకా క్లారిటీ లేదు గానీ! ప్ర‌భుదేవా మాత్రం జోరుగా పావులు క‌దుపుతున్న‌ట్లు తెలిసింది. రీమేక్ ల‌తో హిట్లు కొట్ట‌డం ప్ర‌భుదేవాకి కొట్టిన పిండి. సౌత్ క‌థ‌ల్ని నార్త్ కి..అక్క‌డ క‌థ‌ల్ని సౌత్ కి డంప్ చేసి భారీ విజ‌యాలు సాధించిన ఘ‌న‌త ప్ర‌భుదేవా సొంతం. ఈ నేప‌థ్యంలోనే మెగాస్టార్ కోసం మ‌రో సినిమా క‌థ‌ని లిప్ట్ చేస్తున్న‌ట్లు తెలుస్తోంది. ఇక మెగాస్టార్-ప్రభుదేవా ర్యాపో గురించి చెప్పాల్సిన ప‌నిలేదు. గ‌తంలో చిరంజీవితో ప్ర‌భుదేవా `శంక‌ర్ దాదా జిందాబాద్` చిత్రాన్ని తెర‌కెక్కించిన సంగ‌తి తెలిసిందే.

ఆ సినిమా టాలీవుడ్ లో బ్లాక్ బ‌స్ట‌ర్ అయింది. ఆ త‌ర్వాత ఆ క‌ల‌యిక‌లో మ‌రో సినిమా రాలేదు. ఈ నేప‌థ్యంలో బాస్ ని డైరెక్ట్ చేయ‌డానికి ప్ర‌భుదేవా ఆస‌క్తి చూపిస్తున్నట్లు తెలుస్తోంది. అయితే `లూసీఫ‌ర్` రీమేక్ ఆఫ‌ర్ ముందుగా ప్ర‌భుదేవాకే వ‌చ్చిన‌ట్లు స‌మాచారం. కానీ అప్పుడు ఆయ‌న స‌ల్మాన్ ఖాన్ క‌థానాయకుడిగా బాలీవుడ్ సినిమా `రాధే` లో బిజీగా ఉండ‌టంతో ఛాన్స్ మిస్ చేసుకున్నారుట‌. ఇప్పుడా ఆ ఛాన్స్ ని రీమేక్ రూపంలో భ‌ర్తీ చేయాల‌ని చూస్తున్న‌ట్లు తెలుస్తోంది.