ఈసారి సౌత్‌ పై ఆధారపడుతున్న ‘క్రిష్‌’

బాలీవుడ్‌ లో సూపర్‌ హిట్‌ సిరీస్‌ అయిన ‘క్రిష్‌’ నుండి మరో మూవీ రాబోతుంది. ‘క్రిష్‌ 4’ గురించి ఇటీవలే రాకేష్‌ రోషన్‌ మరియు హృతిక్‌ రోషన్‌ లు హింట్‌ ఇచ్చారు. వీరిద్దరు కూడా ప్రస్తుతం క్రిష్‌ 4 పనిలో ఉన్నట్లుగా తెలుస్తోంది. మొదటి మూడు పార్ట్‌ లు కూడా భారీ విజయాన్ని సొంతం చేసుకున్న నేపథ్యంలో ఈసారి హాలీవుడ్‌ సినిమా రేంజ్‌ లో క్రిష్‌ 4 ను తెరకెక్కించాలని భావిస్తున్నారు. భారీ యాక్షన్‌ సీన్స్‌ తో ప్రేక్షకులను మెస్మరైజ్‌ చేసేందుకు రెడీ అవుతున్నారు.

క్రిష్‌ 3 చిత్రంలో విలన్‌ గా బాలీవుడ్‌ నటుడు వివేక్‌ ఒబేరాయ్‌ నటించిన విషయం తెల్సిందే. ఈసారి క్రిష్‌ తో ఢీ కొట్టబోతున్నది సౌత్‌ స్టార్స్‌ అంటూ బాలీవుడ్‌ వర్గాల్లో ప్రచారం జరుగుతోంది. క్రిష్‌ 4 చిత్రం కోసం ప్రముఖ సౌత్‌ స్టార్స్‌ అయిన ప్రకాష్‌ రాజ్‌ మరియు విజయ్‌ సేతుపతిలు నటించబోతున్నారట. వీరిద్దరు కూడా విలన్‌ పాత్రల్లో నటిస్తారనే చర్చ జరుగుతోంది. ప్రస్తుతం వీరికి సంబంధించిన అధికారిక ప్రకటన అయితే రాలేదు. కాని బాలీవుడ్‌ వర్గాల్లో మాత్రం జోరుగా ప్రచారం జరుగుతోంది.

విలక్షణ నటుడిగా పేరు దక్కించుకున్న ప్రకాష్‌ రాజ్‌ మరియు హీరోగా విలన్‌ గా నటిస్తున్న విజయ్‌ సేతుపతి క్రిష్‌ 4 లో నటించడం వల్ల సౌత్‌ లో ఆ సినిమాకు మంచి మార్కెట్‌ దక్కే అవకాశం కూడా ఉందని అంటున్నారు. ఈసారి ఎందుకు సౌత్‌ స్టార్స్‌ పై రాకేష్‌ రోషన్‌ ఆధారపడుతున్నాడు అనేది ఇంకా క్లారిటీ లేదు.