సింగంకి ఆ టైం సరిపోతుందా??

కోలీవుడ్ హీరో సూర్య-దర్శకుడు హరి కాంబినేషన్ లో వచ్చిన సింగం సిరీస్ లోని రెండు భాగాలు సూపర్ సక్సెస్ అయ్యాయి. ఇప్పుడు రిపబ్లిక్ డే సందర్భంగా జనవరి 26 సింగం సిరీస్ లో మూడో భాగాన్ని రిలీజ్ చేస్తున్నారు. ఇప్పటివరకూ ఎస్3 అని ప్రమోట్ చేసినా.. ఇప్పుడు తమిళ వెర్షన్ పేరును సి3గా మార్చారు.

రిలీజ్ డేట్ మరోవారం రోజుల్లోకి వచ్చేయడంతో సూర్య ప్రమోషనల్ యాక్టివిటీస్ పై దృష్టి పెట్టాడు. అటు తమిళ్.. ఇటు తెలుగు భాషల్లో కూడా ప్రమోషన్స్ చేసుకోవాల్సి ఉంటుంది. అనుష్క.. శృతిహాసన్ లు హీరోయిన్లు కావడంతో.. తెలుగులో కూడా ఆకట్టుకునే అవకాశాలున్నాయి. అయితే.. ప్రస్తుతం తెలుగు రాష్ట్రాల్లో చిరంజీవి ఖైదీ నంబర్ 150.. బాలకృష్ణ గౌతమిపుత్రశాతకర్ణిల హవా నడుస్తోంది. రెండో వారంలో కూడా ఈ సినిమాలు కుమ్మేస్తున్నాయి. రిపబ్లిక్ డే వీకెండ్ వరకూ ఈ సినిమాల కలెక్షన్స్ కు ఢోకా లేదని ట్రేడ్ వర్గాలు అంచనా వేస్తున్నాయి.

అసలు సింగం3కి థియేటర్స్ దొరుకుతాయా అన్నది ఒక డౌట్ అయితే.. దొరికిన ఆ కాసిన్ని స్క్రీన్స్ ను కూడా కాపాడుకోవడం కష్టం అవుతుంది. ఎందుకంటే సూర్యకి దొరికే ఛాన్స్ ఒక వారం మాత్రమే. తర్వాతి వారంలో నాని మూవీ నేను లోకల్ కోసం చాలానే థియేటర్స్ ఇచ్చేయాల్సి ఉంటుంది. ఈ సారి డ్యాన్స్ ఫైట్స్ లతో తన క్లాస్ కి మాస్ ని మిక్స్ చేసి ఆకట్టుకోబోతోన్నాడు నాని. మరి మధ్యలో వారం గ్యాప్ చూసుకుని వస్తున్న సూర్య మూవీ ఏ మాత్రం ఆడియన్స్ ను ఆకట్టుకోనుందో!


Like Us on Facebook : https://www.facebook.com/Tupakidotcom/