నాగ్ కొత్త సినిమాకు ముహూర్తాలు కుదిరాయ్

గత ఏడాది ‘మనం’ లాంటి మంచి సినిమా.. ఈ ఏడాది ‘సోగ్గాడే చిన్నినాయనా’ లాంటి బ్లాక్ బస్టర్.. పైగా రెండూ కూడా సొంత సినిమాలే. అక్కినేని నాగార్జున జోరు మామాలుగా లేదులెండి. ఈ ఊపులో మరో వైవిధ్యమైన సినిమాను ప్రేక్షకుల ముందుకు తేవడానికి రెడీ అవుతున్నాడు నాగ్. వచ్చే నెలలో ఆయన కొత్త సినిమా ‘ఊపిరి’ విడుదల కాబోతోంది. మార్చి 25న టాలీవుడ్ సమ్మర్ సందడికి తెర తీయబోతోంది ఈ సినిమా. ప్రముఖ నిర్మాణ సంస్థ ‘పీవీపీ సినిమా’ నిర్మిస్తున్న ఈ చిత్రానికి వంశీ పైడిపల్లి దర్శకుడు. నాగ్ తో పాటు కార్తి - తమన్నా కీలక పాత్రలు పోషిస్తున్నారు.

ఇప్పటికే ఫస్ట్ లుక్ పోస్టర్లతో ఆకట్టున్న ‘ఊపిరి’.. ఫస్ట్ టీజర్ రిలీజ్ కు, ఆడియో వేడుకకు కూడా ముహూర్తాలు చూసుకుంది. ఈ శనివారం సాయంత్రం 6 గంటలకు ‘ఊపిరి’ ఫస్ట్ టీజర్ రిలీజవబోతోంది. అదే సమయానికి తమిళ వెర్షన్ ‘తొళ’ టీజర్ కూడా విడులవుతుంది. నాగ్ ఈ సినిమా అంతా చక్రాల కుర్చీకి పరిమితమయ్యే పాత్రలో నటిస్తుండటంతో.. ఫస్ట్ టీజర్ లో ఆయనెలా కనిపిస్తారా అన్న ఆసక్తి అందరిలోనూ ఉంది. ఈ నెల 28న ఈ చిత్ర ఆడియో వేడుకను హైదరాబాద్ లో చేయబోతున్నారు. తర్వాత తమిళ ఆడియో ఫంక్షన్ ను ప్రత్యేకంగా చెన్నైలో నిర్వహిస్తారు. ఫ్రెంచ్ మూవీ ‘ది ఇన్ టచబుల్స్’ స్ఫూర్తితో ఈ చిత్రం తెరకెక్కుతున్న సంగతి తెలిసిందే.