ఊపిరి తీసుకునేది వచ్చే ఏడాదే..

నాగార్జున, కార్తి కాంబినేషన్ లో రూపొందిన మల్టీస్టారర్ మూవీ ఊపిరి. వంశీ పైడిపల్లి డైరెక్షన్ లో రూపొందిన ఈ చిత్రంపై అంచనాలు చాలానే ఉన్నాయి. ఫ్రెంచ్ మూవీ ఇన్ టచబుల్స్ ను ఇన్ స్పిరేషన్ గా తీసుకుని.. తెలుగు ప్రేక్షకులకు అనుకూలంగా తీర్చిదిద్దిన ఊపిరిలో.. హైలైట్స్ చాలానే ఉన్నాయి. ఓ ఫ్రెంచ్ భామ సందడి చేయనుండగా.. కార్తీకి జంటగా తమన్నా నటిస్తోంది. మరోవైపు నాగుర్జున లవర్ గా అనుష్క క్యామియో ఇస్తోంది. పారిస్ బ్యాక్ డ్రాప్ లో రూపొందుతున్న ఈ మూవీలో.. నాగ్ పాత్ర ఎక్కువగా వీల్ ఛెయిర్ కే పరిమితం అయి ఉంటుంది.

అంచనాలు బాగానే ఉన్న ఈ మూవీని.. తప్పనిసరి పరిస్థితుల్లో వచ్చే ఏడాదికి వాయిదా వేసినట్లు తెలుస్తోంది. అక్కినేని కొత్త తరం వారసుడు అఖిల్ లాంఛింగ్ మూవీ అఖిల్ విడుదల కావాల్సి ఉంది. ఇది దీపావళికి రిలీజ్ చేస్తారనే అంచనాలున్నాయి. దీని కారణంగా.. నాగచైతన్య మూవీ సాహసం శ్వాసగా సాగిపో కూడా ఆలస్యం అవుతోంది. ఈ రెండింటి తర్వాత.. అప్పుడెప్పుడో మొదలుపెట్టి, వాయిదాలు రీషూట్ లతో ఇబ్బందులు పడుతున్న సోగ్గాడే చిన్ని నాయనకు డేట్ ఫిక్స్ చేయాలి. ఇవన్నీ తెరపైకొచ్చేసరికి.. 2015 పూర్తయిపోవడం ఖాయం. సంక్రాంతికి ఇప్పటికే టైట్ షెడ్యూల్ ఉంది. సర్దార్ గబ్బర్ సింగ్ - నాన్నకు ప్రేమతో - డిక్టేటర్ చిత్రాలు క్యూ కట్టాయి.

ఆ తర్వాత త్రివిక్రమ్ తీర్చిదిద్దుతున్న అ.. ఆ.., అల్లు అర్జున్-బోయపాటి కాంబినేషన్ లో వస్తున్న సరైనోడు రిలీజ్ కావాల్సి ఉంది. వీటన్నిటి మధ్య వచ్చి.. ఊపిరి ఆడని పరిస్థితి తెచ్చుకునేకంటే.. కాస్త ఆలస్యంగా వచ్చి, స్వేచ్ఛగా ఊపిరి పీల్చుకోవాలని అనుకుంటోంది యూనిట్. అందుకే ఊపిరిని వచ్చే ఏడాదికి వాయిదా వేసేసినట్లు తెలుస్తోంది.