రాజా మీద అంత నమ్మకమా?

చిన్న సినిమాగా వచ్చినా భలేభలే మగాడివోయ్ మూవీ అన్ని ఏరియాల్లోనూ సత్తా చాటింది. ముఖ్యంగా అమెరికాలో అయితే.. మిలియన్ డాలర్లకు పైగా కొల్లగొట్టడంతో.. పెట్టుబడికి పదింతలు తెచ్చిపెట్టిందని అంచనా. ఇప్పుడు అలాంటి అంచనాలే శర్వానంద్ నటించిన ఎక్స్ ప్రెస్ రాజా మీద వస్తున్నాయి.

ఎక్స్ ప్రెస్ రాజా హీరో శర్వానంద్ కి రిలీజ్ రోజే భారీగా జనాలని థియేటర్ కి తీసుకొచ్చేంత సత్తా లేదనే చెప్పాలి. మరోవైపు ఈ మూవీ డైరెక్టర్ మేర్లపాక గాంధీ కూడా ఇదే తరహావాడే. మరి ఈ ఇద్దరి కాంబినేషన్ లో వస్తున్న ఎక్స్ ప్రెస్ రాజాపై.. ఓవర్సీస్ డిస్ట్రిబ్యూటర్లు 1.3 కోట్ల రూపాయల పెట్టుబడులు పెట్టేశారు. అది కూడా మినిమం గ్యారంటీ పద్ధతిపై కావడం విశేషం. ఇందు కారణం మిర్చి - రన్ రాజా రన్ - భలే భలే మగాడివోయ్ తర్వాత యూవీ క్రియేషన్స్ నుంచి వస్తున్న చిత్రం కావడమే అంటున్నారు. అయినా సరే ఇంత పెద్ద మొత్తం అంటే రిస్క్ అనే చెప్పాలి.

మూవీ సక్సెస్ అయితే అంతా బాగానే ఉంటుంది కానీ.. ఒక వేళ తేడా వస్తే మాత్రం భారీ నష్టాలు చూడక తప్పదు. అయితే.. బ్యానర్ కి ఉన్న వాల్యూ - శర్వానంద్ ప్రస్తుతం ఫామ్ లో ఉండడం, వెంకటాద్రి ఎక్స్ ప్రెస్ లాంటి హిట్ కొట్టిన డైరెక్టర్, ఇప్పటికే క్రేజ్ సంపాదించిన ప్రోమోలు.. ఊరట కలిగించే విషయాలు. ఇదిలాఉంటే.. ఇప్పటికే దాదాపు రిలీజ్ కి రెడీగా ఉన్న ఈ మూవీని.. సంక్రాంతి ఫైట్ పూర్తయ్యాక.. జనవరి చివర్లో రిలీజ్ చేసేందుకు సిద్ధమవుతున్నారు మేకర్స్.