ద‌ళ‌ప‌తి కోసం పైడిప‌ల్లి స్క్రిప్ట్ రెడీ

తమిళ సూపర్ స్టార్ విజయ్ టాలీవుడ్ లో అడుగుపెడుతున్న సంగ‌తి తెలిసిందే. ఇన్నాళ్లు అనువాద చిత్రాల‌తోనే ఇక్క‌డ ప‌ల‌క‌రించిన విజ‌య్ తొలిసారి ఒక తెలుగు ద‌ర్శ‌కుడు వినిపించిన క‌థ‌ను లాక్ చేశాడు. ద‌ళ‌ప‌తి 66 గా ఈ సినిమా గురించి ప్ర‌చారం సాగుతోంది. విజ‌య్ కి ఇదే మొదటి స్ట్రెయిట్ తెలుగు సినిమా. ఈ చిత్రానికి వంశీ పైడిపల్లి దర్శకత్వం వహిస్తుండగా దిల్ రాజు నిర్మిస్తున్న సంగతి తెలిసిందే.ఇప్పుడు ద‌ళ‌పతి 66కి సంబంధించిన స్క్రిప్టు పనులు పూర్తి చేసినట్లు వంశీ వెల్లడించారు.

ద‌ళ‌పతి 66 స్క్రిప్ట్ లాక్ చేసాం. డిసెంబర్‌ నుంచి ప్రాజెక్ట్ కి సంబంధించిన మరిన్ని అప్ డేట్ లను విడుదల చేస్తాం`` అని వంశీ తెలిపారు. దళపతి 66 చిత్రాన్ని అత్యంత భారీ స్థాయిలో చిత్రీకరిస్తామని అత్యున్న‌త సాంకేతిక నిపుణుల బృందం ఈ సినిమాకి పని చేస్తుందని వంశీ వెల్లడించారు.

మురుగ‌దాస్ తెర‌కెక్కించిన తుపాకి సినిమా నుంచి విజ‌య్ కి తెలుగు బెల్ట్ లోనూ అభిమానులు పెరిగారు. అతడిలోని ఎన‌ర్జీ న‌ట‌న‌లో డైన‌మిజం డ్యాన్సులు తెలుగు ఆడియెన్ కి న‌చ్చాయి. అందుకే ఇప్పుడు విజ‌య్ పాన్ ఇండియా కేట‌గిరీలో ప్ర‌తిదీ ప్లాన్ చేస్తున్నారు. తెలుగు స్ట్రెయిట్ సినిమాలో న‌టించే ఆలోచ‌న వెన‌క మార్కెటింగ్ వ్యూహం దాగి ఉంద‌ని విశ్లేషిస్తున్నారు.