మన జెర్సీని మెచ్చిన పాక్‌ క్రికెటర్‌

నాని హీరోగా గౌతమ్ తిన్ననూరి దర్శకత్వంలో తెరకెక్కి ప్రేక్షకుల ముందుకు వచ్చిన జెర్సీ సినిమా ఎంతటి ఘన విజయాన్ని సొంతం చేసుకుందో ప్రత్యేకంగా చెప్పనక్కర్లేదు. తెలుగు లో విమర్శకుల ప్రశంసలు దక్కించుకోవడంతో పాటు అవార్డులను దక్కించుకున్న జెర్సీని హిందీలో రీమేక్ చేశారు. షాహిద్‌ కపూర్‌ హీరోగా గౌతమ్ తిన్ననూరి అక్కడ రీమేక్ చేయడం జరిగింది.

హిందీ రీమేక్‌ కు కూడా మంచి మార్కులు పడ్డాయి. కమర్షియల్‌ గా సినిమా నిరాశ పర్చినా కూడా విమర్శకుల ప్రశంసలు దక్కాయి. కరోనాతో పాటు ఇతర కారణాల వల్ల సినిమా వసూళ్లు తీవ్రంగా నిరాశ పర్చాయి.

వందల కోట్ల వసూళ్లు ఖాయం అనుకుంటే మినిమం కూడా రాలేదు అనేది టాక్‌. ఇప్పుడు జెర్సీ ఓటీటీ లో స్ట్రీమింగ్‌ అవుతుంది. తాజాగా జెర్సీ మరోసారి వార్తల్లో నిలిచింది.

పాకిస్తాన్‌ క్రికెటర్ మహ్మద్‌ అమీర్ జెర్సీ సినిమాపై ప్రశంసలు కురిపించాడు. ఒక మంచి ఇన్సిపిరేషనల్‌ మూవీ అంటూ హీరో షాహిద్ కపూర్ కు అభినందనలు తెలియజేస్తూ ట్వీట్‌ చేశాడు. ఓటీటీ ద్వారా మంచి వ్యూస్ ను దక్కించుకుంటున్న జెర్సీ సినిమా కు పాక్ క్రికెటర్ ఇచ్చిన కామెంట్స్ తో మరింతగా ఆధరణ పెరిగే అవకాశం ఉందని ఇండస్ట్రీ వర్గాల వారు అభిప్రాయం వ్యక్తం చేస్తున్నారు.

హిందీ జెర్సీ సినిమాలో షాహిద్‌ కపూర్ కు జోడీగా మృనాట్‌ ఠాకూర్ నటించింది. తెలుగు లో నాని కనబర్చిన నటనను మ్యాచ్ చేస్తూ షాహిద్ కపూర్ నటించాడంటూ విమర్శకుల ప్రశంసలు దక్కాయి.

సినిమా ప్రీమియర్‌ షో వేసిన సమయంలో దర్శకుడు గౌతమ్‌ తిన్ననూరికి మరియు సినిమాకు ప్రేక్షకులు నిల్చుని చపట్లు కొడుతూ అభినందించిన వీడియో ఆ సమయంలో వైరల్‌ అయ్యింది.