జాతీయ స్థాయి ప్రాజెక్ట్ లో రెజీనా జాక్ పాట్

చెన్నై సోయగం రెజీనా క‌సాండ్రా కెరీర్ నెమ్మ‌దిగా మ‌ళ్లీ పుంజుకున్న‌ట్లే క‌నిపిస్తోంది. ప్ర‌స్తుతం తెలుగు- త‌మిళ్ లో అర‌డ‌జ‌న‌కు పైగానే సినిమాలు చేస్తోంది. త‌న‌ పాత్రకు ప్రాధాన్య‌త ఎంత‌? అన్న‌ది అటుంచితే న‌టించే సినిమాల‌ జాబితా మాత్రం పెద్దగానే ఉంది. వీటిలో కొన్ని సినిమాలు చిత్రీక‌ర‌ణ పూర్తి చేసుకుని రిలీజ్ ల‌కు నోచుకోలేదు.

తాజాగా రెజీనా వెబ్ సిరీస్ లతో బిజీ అయ్యేందుక ప్ర‌య‌త్నిస్తోంది. నిజానికి బాహుబ‌లి నిర్మాత‌లు రెజీనాతో ఒక క్రేజీ వెబ్ సిరీస్ చేస్తున్న‌ట్లు ప్ర‌చారం సాగినా కానీ ఇప్ప‌టివ‌ర‌కూ అది కార్య‌రూపం దాల్చ‌లేదు. అయితే తాజా అప్ డేట్ ప్ర‌కారం.. వేరొక క్రేజీ వెబ్ సిరీస్ కి ఎంపికైంద‌ని తెలిసింది.

బాలీవుడ్ లో రాయ్ క‌పూర్ ఫిల్మ్స్ అండ్ ఎమ్మీ ఎంట‌ర్ టైన్ మెంట్స్ సంయుక్తంగా నిర్మిస్తోన్న `రాకెట్ బోయ్స్` వెబ్ సిరీస్ లో కీల‌క పాత్ర‌కు ఎంపికైంది. రాకెట్ బోయ్స్ వెబ్ సిరీస్ కు మంచి క్రేజ్ ఉంది. ఇదో సైన్స్ ఫిక్ష‌న్ వెబ్ సిరీస్. అంత‌రిక్ష ప‌రిశోధ‌నా రంగంలో విశేష కృషి చేసిన స్పేస్ దిగ్గ‌జాలు ఏపీజే అబ్దుల్ క‌లాం- విక్ర‌మ్ సారాభాయ్- హోమీ బాబా లాంటి మేథావుల ఇతి వృత్తం ఆధారంగా రాకెట్ బోయ్స్ ని తెర‌కెక్కిస్తున్నారు. ఇందులో ఇశ్వాక్ సింగ్- జిమ్ స‌ర్భ్ ప్ర‌ధాన పాత్ర‌లు పోషిస్తున్నారు.

స్పేస్ నేప‌థ్యంలో సిరీస్ కాబ‌ట్టి ఇది జాతీయ అంత‌ర్జాతీయ ఆడియెన్ దృష్టిని ఆక‌ర్షిస్తుంద‌న‌డంలో సందేహ‌మేం లేదు. ఇలాంటి ప్ర‌తిష్టాత్మ‌క ప్రాజెక్ట్ లో రెజీనా భాగ‌మ‌వ్వ‌డం ల‌క్కీ అనే చెప్పాలి. బాలీవుడ్ లో ఇప్ప‌టికే `ఏక్ ల‌డ‌కీ కో తో అసీ ల‌గా` చిత్రంతో రంగ ప్ర‌వేశం చేసిన రెజీనాకు అక్క‌డ కాలం క‌లిసి రాలేదు. మ‌ళ్లీ ఇన్నాళ్ల‌కు ఓ హిందీ వెబ్ సిరిస్ లో నటించే ఛాన్స్ ద‌క్కించుకోవ‌డం విశేషం.