పాన్ ఇండియా స్టార్ షూటింగ్ ప్లాన్ రెడీ..!

పాన్ ఇండియా స్టార్ ప్ర‌భాస్ - రాధాకృష్ణ కుమార్ కాంబినేషన్ లో రూపొందుతున్న పీరియాడిక‌ల్ ల‌వ్‌ స్టోరీ ''రాధే శ్యామ్''. కోవిడ్ నేపథ్యంలో నిలిచిపోయిన షూటింగ్ ను ఇటీవలే తిరిగి ప్రారంభించారు. ప్రస్తుతం హైదరాబాద్ లో జరుగుతున్న ఈ షెడ్యూల్ లో ఓ డ్యూయెట్ సాంగ్ మరియు కొన్ని కీలక సన్నివేశాలను చిత్రీకరించనున్నారు. ఈ నేపథ్యంలో వీలైనంత త్వరగా 'రాధే శ్యామ్' పెండింగ్ పోర్షన్ కంప్లీట్ చేయాలని దర్శకుడిని కోరినట్లు తెలుస్తోంది.

ప్రభాస్ హీరోగా నటిస్తున్న మరో రెండు ప్రాజెక్ట్స్ సెట్స్ పై ఉండటంతో 'రాధే శ్యామ్' ని త్వరగా పూర్తి చేయాలని నిర్ణయించుకున్నారు. ఈ క్రమంలో ప్రశాంత్ నీల్ తో 'సలార్'.. ఓం రౌత్ తో 'ఆదిపురుష్' చిత్రాలను ప్యారలల్ గా జరిగేలా షూటింగ్ ప్లాన్ చేస్తున్నారట. ఇప్పటికే 'ఆది పురుష్' లో సైఫ్ అలీఖాన్ కు సంబంధించిన చిత్రీకరణ జరుపుతున్నారని బీ టౌన్ వర్గాలు వెల్లడించాయి. 'రాధే శ్యామ్' చిత్రాన్ని కానిచ్చేస్తే ప్రభాస్ కూడా జాయిన్ అవుతారు. అలానే ప్రశాంత్ నీల్ 'కేజీఎఫ్: చాప్టర్ 2' ప్యాచ్ వర్క్ కంప్లీట్ చేసి వచ్చిన వెంటనే.. 'సలార్' షురూ చేయాలని భావిస్తున్నారట.

ఇకపోతే 'రాధే శ్యామ్' చిత్రాన్ని దసరా బరిలో నిలిపే ఆలోచన చేస్తున్నారని టాక్ నడుస్తోంది. ఈ నేపథ్యంలో ఇప్ప‌టి వ‌ర‌కు షూటింగ్ జరుపుకున్న దానికి సంబంధించిన పోస్ట్ ప్రొడ‌క్ష‌న్ వర్క్స్ కూడా పూర్తి చేసారని తెలుస్తోంది. పెండింగ్ షూట్ కంప్లీట్ చేసిన తర్వాత విడుదల తేదీపై అధికారిక ప్రకటన చేసే అవకాశం ఉంది. అలానే త్వరలోనే ప్రమోషన్స్ స్టార్ట్ చేయాలని ప్లాన్ చేసిన మేకర్స్.. ముందుగా ఫస్ట్ సింగిల్ రిలీజ్ చేయనున్నారని సమాచారం.