'పుష్ప 2' కూడా ఆ సినిమాల సరసన చేరుతుందా..?

స్టైలిష్ స్టార్ అల్లు అర్జున్ హీరోగా సుకుమార్ దర్శకత్వంలో తెరకెక్కిన మాస్ యాక్షన్ థ్రిల్లర్ ''పుష్ప''. శేషాచలం అడవుల్లోని ఎర్ర చందనం బ్యాక్ డ్రాప్ లో సెట్ చేయబడిన ఈ చిత్రాన్ని రెండు భాగాలుగా ప్లాన్ చేశారు. గతేడాది చివర్లో ప్రేక్షకుల ముందుకు వచ్చిన 'పుష్ప: ది రైజ్' బాక్సాపీస్ వద్ద ఘన విజయం సాధించింది.

'పుష్ప 2' సినిమా ప్రపంచ వ్యాప్తంగా రూ. 360 కోట్లకు పైగా గ్రాస్ వసూలు చేసి ఆల్ టైం హయ్యెస్ట్ గ్రాసింగ్ సౌత్ మూవీస్ జాబితాలో చోటు సంపాదించింది. ముఖ్యంగా నార్త్ సర్క్యూట్ లో ఎలాంటి అంచనాలు లేకుండా వచ్చి వంద కోట్లకు పైగా కలెక్షన్స్ అందుకుంది. దీంతో ఇప్పుడు 'పుప్పు: ది రూల్' సినిమాపై భారీ అంచనాలు ఏర్పడ్డాయి.

రెండు భాగాలుగా రూపొందిన దక్షిణాది చిత్రాలలో 'రోబో' 'బాహుబలి' మరియు 'కేజీఎఫ్' వంటి సినిమాలు బాలీవుడ్ మార్కెట్ లో భారీ వసూళ్ళు అందుకున్నాయి. రజినీకాంత్ - శంకర్ కాంబోలో వచ్చిన 'రోబోట్' మూవీ హిందీలో రూ. 22 కోట్ల నెట్ రాబట్టింది. అక్షయ్ కుమార్ కూడా భాగమైన '2.0' సినిమా రూ. 189 కోట్లు కలెక్ట్ చేసింది.

అలానే ప్రభాస్ హీరోగా ఎస్ఎస్ రాజమౌళి తెరకెక్కించిన 'బాహుబలి: ది బిగినింగ్' సినిమా రూ. 115 కోట్ల నెట్ సాధించింది. ఇక 'బాహుబలి: ది కన్ క్లూజన్' అయితే రూ. 510 కోట్లకు పైగా వసూళ్లతో సంచనలం సృష్టించింది. యష్ - ప్రశాంత్ నీల్ కాంబోలో వచ్చిన 'కేజీయఫ్ 1' చిత్రం నార్త్ లో రూ. 45 కోట్లు రాబట్టింది.

సంజయ్ దత్ - రవీనా టాండన్ వంటి బాలీవుడ్ స్టార్స్ కూడా భాగమైన 'కేజీయఫ్: చాప్టర్ 2' రూ. 434 కోట్ల నెట్ తో బ్లాక్ బస్టర్ అయింది. ఈ నేపథ్యంలో బన్నీ - సుక్కూ కాంబినేషన్ లో రాబోతున్న ''పుష్ప'' పార్ట్-2 సినిమా కూడా భారీ కలెక్షన్స్ తో ఈ సినిమాల సరసన చేరుతుందా అనే చర్చ మొదలైంది.

'పుష్ప: ది రైజ్' సినిమా హిందీ మార్కెట్ లో రూ. 108 కోట్ల నెట్ కలెక్షన్స్ అందుకుంది. ఇప్పుడు రెండో భాగం పై ఉత్తరాదిలో నెలకొన్న హైప్ చూస్తుంటే.. బాక్సాఫీస్ వద్ద వసూళ్ల వర్షం కురవడం ఖాయంగా కనిపిస్తోంది. దీనికి తగ్గట్టుగానే తొలి భాగాన్ని మించేలా 'పుష్ప 2' చిత్రాన్ని తెరకెక్కించడానికి మేకర్స్ ప్లాన్ చేస్తున్నారు.

పార్ట్-1 బ్లాక్ బస్టర్ అవడంతో ఇప్పుడు పార్ట్-2 కథకు కాస్త అదనపు హంగులు అద్దడంతో పాటు.. హీరో ఎలివేషన్స్ మరియు ఎమోషన్స్ ఎక్కువగా ఉండేలా స్క్రిప్టు రెడీ చేసినట్లు టాక్ వినిపిస్తోంది. అందుకే సెట్స్ మీదకు తీసుకెళ్లాడానికి టైం తీసుకుంటున్నారని అంటున్నారు. ప్రస్తుతం వినిపిస్తున్న టాక్ ప్రకారం జులై చివర్లో లేదా ఆగస్టు మొదటి వారంలో ఈ సినిమా రెగ్యులర్ షూటింగ్ ప్రారంభం కానుందని తెలుస్తోంది.

కూలీగా జీవితాన్ని ప్రారంభించిన పుష్పరాజ్ ఎర్ర చందనం స్మగ్లింగ్ సిండికేట్ ను శాసించే స్థాయికి ఎలా ఎదిగాడు అనేది 'పుష్ప: ది రైజ్' లో చూపించారు. డాన్‌ గా ఎదిగిన పుష్పరాజ్ ప్రయాణంలో ఎలాంటి కష్టాలు ఎదుర్కొన్నాడనేది 'పుష్ప 2' లో చూపించబోతున్నారు.

మైత్రీ మూవీ మేకర్స్ భారీ బడ్జెట్‌ తో రూపొందున్న 'పుష్ప: ది రూల్' సినిమాలో అల్లు అర్జున్ సరసన రష్మిక మందన్నా హీరోయిన్ గా నటించనుండగా.. ఫహాద్ ఫాజిల్ - సునీల్ - రావు రమేష్ - అజయ్ ఇతర పాత్రల్లో నటిస్తారు. రాక్ స్టార్ దేవిశ్రీ ప్రసాద్ మొదటి భాగానికి మించిన పాటలు ఇవ్వడాని సన్నద్ధం అవుతున్నారు.