వీడియో సాంగ్‌: మిస్ట‌ర్ మ‌మ్మీ ఫ్రెగ్నెన్సీ పాట్లు చూశారా?

మ‌హారాష్ట్ర 14వ ముఖ్య‌మంత్రి విలాస్ రావ్ దేశ్ ముఖ్ వార‌సుడు రితేష్ దేశ్ ముఖ్ ప‌రిచ‌యం అవ‌సరం లేదు. అత‌డు రాజ‌కీయ కుటుంబం నుంచి వ‌చ్చినా కానీ గ్లామ‌ర్ రంగంలో హీరోగా సెటిల‌య్యాడు. అంతేకాదు రితేష్ ప్రేమ వివాహం సినిమాటిగ్గా జ‌రిగింద‌ని చెబుతారు. త‌న‌ ఇంట్లో అంద‌రినీ ఎదురించి స‌హ‌న‌టి.. అందాల క‌థానాయిక జెనీలియా (మ‌న అల్ల‌రి హాసిని)ని ప్రేమించి పెళ్లాడాడు. ఈ ఆద‌ర్శ‌ జంట‌కు ఇప్పుడు ఇద్ద‌రు వార‌సులు ఉన్నారు. రితేష్ బాలీవుడ్ లో ప‌లు బ్లాక్ బ‌స్ట‌ర్ కామెడీ చిత్రాల్లో న‌టించాడు. చ‌క్క‌ని టైమింగ్ తెలిసిన కామెడీ హీరోగా ప్ర‌యోగాత్మ‌క చిత్రాల‌తో మెప్పించాడు. ఇప్పుడు అత‌డు మ‌రో ప్ర‌యోగాత్మక చిత్రంతో అంద‌రినీ ఆశ్చ‌ర్య‌ప‌రుస్తున్నాడు.

అబ్బాయి అమ్మాయిలా గ‌ర్భం దాల్చితే ఆ త‌ర్వాత ఏం జ‌రిగింది? అనే ప్ర‌యోగాత్మ‌క‌ క‌థ‌తో మిస్ట‌ర్ మ‌మ్మీ హిందీలో తెర‌కెక్కుతోంది. మ‌రాఠీలోను ఈ చిత్రం విడుద‌ల కానుంది. ఈ సినిమా ప్ర‌చారం ఊపందుకుంది. ఇంత‌కుముందు రితేష్ గ‌ర్భం దాల్చిన యువ‌కుడిగా క‌నిపించే ఫ‌స్ట్ లుక్ పోస్ట‌ర్లు ఇంట‌ర్నెట్ ని షేక్ చేశాయి.

ఇప్పుడు ఏకంగా మిస్టర్ మమ్మీ పాట 'పాపాజీ పెట్ సే..' నెట్ లో రిలీజైంది. 'గర్భిణీ' రితేష్ దేశ్‌ముఖ్ పై ఎంతో చమత్కారమైన ఆహ్లాదకరమైన బాణీ ఇది. మిస్టర్ మమ్మీ నవంబర్ 18న థియేటర్లలో విడుదల కానుంది. మొదటి పాట 'చుప్కే చుప్కే'తో హృదయాలను గెలుచుకున్న తర్వాత ఇప్పుడు రెండవ పాట 'పాపాజీ పెట్ సే..'కి అంతే మంచి స్పంద‌న ద‌క్కుతోంది.

ఎంతో ఆహ్లాదకరమైన సజీవమైన ఈ పాటను స్నేహా ఖాన్వాల్కర్ స్వరపరచగా అమిత్ గుప్తా - స్నేహా ఖాన్వాల్కర్ స్వరాలు అందించారు. ఈ పాట ఆద్యంతం ఎంతో ప‌సందైన వినోదాత్మ‌క‌మైన ప‌ద‌జాలం దానికి త‌గ్గ‌ట్టు రితేష్ ఎక్స్ ప్రెష‌న్స్ ఆక‌ట్టుకున్నాయి.

శ్మ‌శానంలో నిండు గ‌ర్భిణితో వేషాలు న‌వ్వులు పూయించాయి. పోస్ట‌ర్లు పాట‌ల‌తోనే ఇంత కిక్ ఇస్తున్న ఈ సినిమా పూర్తి స్థాయిలో ఏ లెవ‌ల్లో ఎంట‌ర్ టైన్ చేస్తుందో ఊహంచ‌వ‌చ్చు. కాన్సెప్ట్ యూనిక్ గా ఉంది కాబ‌ట్టి పాన్ ఇండియా కేట‌గిరీలో విడుద‌ల కావ‌డం ఖాయంగా క‌నిపిస్తోంది.

టి సిరీస్ స‌మ‌ర్ప‌ణ‌లో హెక్టిక్ సినిమా ప్రైవేట్ లిమిటెడ్ ప్రొడక్షన్- బౌండ్ స్క్రిప్ట్ పిక్చర్స్ లిమిటెడ్ ప్రొడక్షన్ ఈ చిత్రాన్ని సంయుక్తంగా నిర్మించాయి. రితీష్ దేశ్‌ముఖ్ -జెనీలియా దేశ్‌ముఖ్ జంట‌గా నటించ‌గా షాద్ అలీ దర్శకత్వం వహించారు. ఈ చిత్రాన్ని టి-సిరీస్ శివ అనంత్ -షాద్ అలీ నిర్మించారు. 18 నవంబర్ 2022న దేశవ్యాప్తంగా విడుదల చేయనున్నారు.




నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.