పరశురామ్ కు ప్లాప్ నిజం ముందు తెలుసంట

కాలం మారింది. గతంలో మాదిరి సినిమా వాళ్ల నోటి నుంచి లోకం పచ్చగా.. సుభిక్షంగా ఉందన్నట్లుగా సినిమాటిక్ మాటలు చెప్పటం తగ్గించేశారు. కాస్త నొప్పిగా అనిపించినా సూటిగా చెప్పేసే వారు ఇప్పుడు వచ్చేశారు. అలాంటి దర్శకుల్లో పరుశురామ్ ఒకరు. శీరస్తు శుభమస్తుతో ఒక హిట్ ను తన ఖాతాలో వేసుకున్న ఆయన.. ఒక ఆసక్తికర విషయాన్ని చెప్పుకొచ్చారు.

తాను గతంలో తీసిన సారొస్తారు సినిమాకు సంబంధించిన పచ్చి నిజాన్ని బయటపెట్టారు. ఆ సినిమా విడుదల కావటానికి నాలుగు రోజుల ముందు ఫైనల్ కాపీ చూశానని.. అప్పుడే సినిమా ప్లాప్ అవుతుందని తనకు అర్థమైందని చెప్పారు. కానీ.. అప్పటికి తానేం చేయలేని పరిస్థితుల్లో ఉన్నానని నిజాన్ని నిర్భయంగా ఒప్పుకున్నారు. రవితేజ కెరీర్ లో అతి తక్కువ ఓపెనింగ్స్ తో పాటు.. అతి త్వరగా థియేటర్ల నుంచి మాయమైన సినిమా అంటే అది సారొస్తారే.

ఆ సినిమా ప్లాప్అయినా తనకు గీతా ఆర్ట్స్ లాంటి బ్యానర్ లో పని చేయటానికి అవకాశం దక్కించుకున్న వైనాన్న్ వివరించిన పరశురామ్.. బన్నీతో సినిమా చేయటానికి ట్రై చేస్తే కుదరలేదని.. తానో కథను బన్నీకి చెప్పానని.. కాకుంటే కుదర్లేదన్నారు. అప్పుడు అల్లుఅరవింద్ పిలిచి.. శిరీశ్ సినిమా చేయాలనుకుంటున్న విషయాన్ని చెప్పారన్నారు. బన్నీ తన చేతిలో చెక్కు పెట్టి తన నమ్మకాన్ని నిలబెట్టాలన్నారని చెప్పారు పరశురామ్. శీరస్తు.. శుభమస్తుకు వచ్చిన పాజిటివ్ టాక్ కు అల్లు అరవింద్ సంతోషించారని.. మరో సినిమా చేయమని చెప్పుకొచ్చారు. సో.. మళ్లీ గీతా ఆర్ట్స్ మీదనే మరో సినిమాను పరశురామ్ చేయునున్నారా..?