శ్రీరస్తు శుభమస్తు.. రీషూట్ అద్భుతస్తు

అల్లు శిరీష్- లావణ్య త్రిపాఠి జంటగా నటించిన శ్రీరస్తు శుభమస్తు ప్రేక్షకుల ముందుకు వచ్చేసింది. రొమాంటిక్ కామెడీ చిత్రాన్ని ఫ్యామిలీ జోనర్ లో తీసిన దర్శకుడు పరశురాం.. ఇప్పుడు నిలువెల్లా అభినందనల్లో తడిసిపోతున్నాడు. ఇంత పర్ఫెక్ట్ గా పిక్చర్ ని హ్యాండిల్ చేయడంపై అందరూ ప్రశంసిస్తున్నారు. అయితే.. శ్రీరస్తు శుభమస్తు ముందుగా అనుకున్న దాని కంటే కొంత ఆలస్యం అయిన విషయం తెలిసిందే. దీనిపై ఇప్పుడు వివరణ ఇచ్చాడు దర్శకుడు.

మొత్తం షూటింగ్ అయిపోయాక.. రషెస్ చూసుకుంటే కొన్ని సీన్స్ పర్ఫెక్ట్ గా రాలేదనే ఫీలింగ్ వచ్చిందట. అందులో కొన్ని కామెడీ సీన్స్ తో పాటు ఎమోషనల్ సన్నివేశాలు కూడా ఉన్నాయంటున్నాడు. మొత్తం సీన్స్ ని రీషూట్ చేయాలని నిర్ణయించడం.. అందరి డేట్స్ సెట్ చేసుకుని పిక్చరైజ్ చేయాల్సి రావడంతో లేట్ అయిందట. సినిమాని రిలీజ్ చేసేశాక.. అప్పుడు ఆయా సన్నివేశాల గురించి ఫీలయ్యేందుకు బదులుగా.. ముందుగానే మార్చుకోవడంలో ఎలాంటి తప్పు లేదని.. శిరీష్ కూడా అదే మాట చెప్పి ధైర్యం చెప్పాడని అన్నాడు పరశురామ్.

రీసెంట్ గా జనతా గ్యారేజ్ ఆలస్యానికి సంబంధించి కూడా ఆలస్యానికి కారణం.. రీషూటేనా అంటూ కొరటాలని అడిగినపుడు ఇలాంటి సమాధానమే వచ్చింది. ఏ సినిమాకైనా రీషూట్ మంచిదే అని.. ఔట్ పుట్ బాగుండడానికి రీషూట్ చేయడం తప్పులేదని అన్నాడు కొరటాల శివ. ఆ మాటలు కొరటాల మొన్నీ మధ్యే చెప్పినా.. ముందే అదే రూట్ ను పాటించేసి మరీ.. మాంచి సినిమాతో ఆడియన్స్ ముందుకొచ్చిన శ్రీరస్తు శుభమస్తు టీమ్ ని అభినందించాల్సిందే.