మెగా అల్లుడి 'కిన్నెరసాని' చిత్రం నుంచి 'పార్వతీపురం' పాట..!

'విజేత' సినిమాతో హీరోగా పరిచయమైన మెగా అల్లుడు కళ్యాణ్ దేవ్ నటిస్తున్న తాజా చిత్రం ''కిన్నెరసాని''. 'అతి స‌ర్వ‌త్ర వ‌ర్జ‌య‌త్' అనేది దీనికి ఉప శీర్షిక. మిస్టరీ థ్రిల్లర్ కథాంశంతో 'అశ్వథ్థామ' ఫేమ్ రమణ తేజ్ ఈ చిత్రాన్ని తెరకెక్కిస్తున్నారు. ఇప్పటికే విడుదలైన ప్రచార చిత్రాలు - ఫస్ట్ గ్లిమ్స్ - థీమ్ ఆఫ్ కిన్నెరసాని - టీజర్ విశేష స్పందన తెచ్చుకుని.. సినిమాపై ఆసక్తిని రెట్టింపు చేశాయి. ఈ క్రమంలో తాజాగా 'పార్వతీపురం' అనే సాంగ్ లిరికల్ వీడియోని చిత్ర బృందం రిలీజ్ చేసింది.

'దారి కాని దారిలోన.. ఊదు పొదలనా.. పెద్ద కొడుకు మర్రిచెట్టు.. నాకు చివరనా.. సిచ్చు కంట చెరువు గట్టు.. తూరుపున్నదే..' అంటూ సాగిన ఈ పాట శ్రోతలకు మంచి అనుభూతిని కలిగిస్తోంది. యువ సంగీత దర్శకుడు మ‌హ‌తి స్వర సాగ‌ర్ దీనికి ట్యూన్ కంపోజ్ చేశారు. లిరిసిస్ట్ కిట్టు విస్సాప్రగడ పెద్దగా వాడుకలో లేని పదాలను ఈ పాత్రకు సాహిత్యంగా సమకూర్చారు. ఉమా నేహా - రేవంత్ - ధనుంజయ సీపాన ఈ గీతాన్ని ఆలపించారు.

'పార్వతీపురం' పాట ఈ మధ్య కాలంలో వచ్చిన సాంగ్స్ లో ప్రత్యేకమైనదని చెప్పవచ్చు. ''కిన్నెరసాని'' చిత్రానికి దేశరాజ్ సాయితేజ్ కథ - స్క్రీన్ ప్లే అందిస్తున్నారు. ఈ చిత్రానికి దినేష్ కె బాబు సినిమాటోగ్రఫీ అందించగా.. అన్వర్ అలీ ఎడిటింగ్ వర్క్ చేస్తున్నారు. అన్బు అరీవ్ యాక్షన్ కొరియోగ్రఫీ చేశారు. సాయి రిషిక సమర్పణలో ఎస్.ఆర్.టి ఎంటర్టైన్మెంట్స్ - శుభమ్ ఎంట‌ర్టైన్మెంట్స్ బ్యానర్స్ పై రామ్ త‌ళ్లూరి ఈ చిత్రాన్ని నిర్మిస్తున్నారు.

తండ్రి కోసం ఓ యువకుడు సాగించిన అన్వేషణే 'కిన్నెరసాని' కధాంశమని తెలుస్తోంది. ఇందులో వేదా అనే పాత్రలో కళ్యాణ్ దేవ్ కనిపించనున్నాడు. రవీంద్ర విజయ్ - ఆన్ శీతల్ - మహతి బిక్షు - కాశిష్ ఖాన్ తదితరులు ఇతర పాత్రలు పోషించారు. త్వరలోనే ఈ చిత్రాన్ని ప్రేక్షకుల ముందుకు తీసుకురావాలని మేకర్స్ ప్లాన్ చేస్తున్నారు. విభిన్నమైన కథ కథనాలతో వస్తున్న 'కిన్నెరసాని' మెగా అల్లుడికి ఎలాంటి సక్సెస్ అందిస్తుందో చూడాలి.