'డీజే టిల్లు' కోసం రాక్ స్టార్ పాడిన 'పటాస్ పిల్లా' సాంగ్..!

యువ హీరో సిద్ధు జొన్నలగడ్డ - యంగ్ బ్యూటీ నేహాశెట్టి జంటగా నటించిన తాజా చిత్రం ''డీజే టిల్లు''. 'అట్లుంటది మనతోని' అనేది దీనికి ట్యాగ్ లైన్. సితార ఎంటర్టైన్మెంట్స్ బ్యానర్ లో రూపొందిన ఈ చిత్రానికి విమల్ కృష్ణ దర్శకత్వం వహించారు. సంక్రాంతి సందర్భంగా విడుదల కావాల్సిన ఈ సినిమా వాయిదా పడింది.

ఇప్పటికే ''డీజే టిల్లు'' నుంచి వచ్చిన ప్రచార చిత్రాలు - టీజర్ - సాంగ్స్ మంచి స్పందన తెచ్చుకున్నాయి. ఈ క్రమంలో తాజాగా సినిమాలోని 'పటాస్ పిల్లా' అనే మరో పాటను మేకర్స్ రిలీజ్ చేశారు. 'రాజా రాజా ఐటమ్ రాజా.. రోజా రోజా క్రేజీ రోజా..లేజీ లేజీ గుండెల్లోనా.. డీజీ డీజే కొట్టేసిందా..' అంటూ క్యాచీ లిరిక్స్ తో కూడిన ఈ సాంగ్ శ్రోతలను అలరిస్తోంది.

'పటాస్ పిల్లా' పాటను కోలీవుడ్ రాక్ స్టార్ అనిరుధ్ రవి చంద్రన్ పాడటం విశేషం. యంగ్ మ్యూజిక్ సెన్సేషన్ మరోసారి తన వాయిస్ తో మ్యాజిక్ చేశాడనే చెప్పాలి. శ్రీ చరణ్ పాకాల సమకూర్చిన బ్యూటిఫుల్ ట్యూన్ కు తగ్గట్టుగా కిట్టు విస్సా ప్రగడ సాహిత్యం అందించారు.

ఇందులో యువ హీరోహీరోయిన్ల మధ్య కెమిస్ట్రీ బాగా కుదిరినట్లు తెలుస్తోంది. పటాస్ పిల్ల నేహా శెట్టి తన అందచందాలతో కవ్విస్తుండగా.. సిద్ధు ఆమె సోయగాలకు మైమర్చిపోతున్నాడు. ఇద్దరి మధ్య రొమాంటిక్ సన్నివేశాలు - లిప్ లాప్ సీన్స్ హైలైట్ గా నిలిచాయి. అందుకే ఈ పాట విడుదలైన కొద్ది సేపటికే సోషల్ మీడియాలో వైరల్ గా మారింది.

''డీజే టిల్లు'' చిత్రానికి ఎస్ ఎస్ థమన్ బ్యాగ్రౌండ్ స్కోర్ కంపోజ్ చేశారు. సాయి ప్రకాష్ ఉమ్మడిసింగు సినిమాటోగ్రఫీ నిర్వహించగా.. అవినాష్ కొల్లా ఆర్ట్ డైరెక్టర్ గా వ్యవహరించారు. నవీన్ నూలి ఎడిటింగ్ వర్క్ చేస్తున్నారు. ఈ చిత్రానికి స్టోరీ - స్క్రీన్ ప్లే - డైలాగ్స్ హీరో సిద్ధు జొన్నలగడ్డ అందించడం విశేషం. పీడీవీ ప్రసాద్ సమర్పణలో ఫార్చ్యూన్ ఫోర్ సినిమాస్ బ్యానర్ తో కలిసి సూర్యదేవర నాగవంశీ ఈ చిత్రాన్ని నిర్మించారు.