పిక్ టాక్: ఇంటెన్స్ టేక్ తర్వాత.. వీరమల్లు ఇలా..!

క్రిష్ జాగర్లమూడి దర్శకత్వంలో పవన్ కళ్యాణ్ హీరోగా తెరకెక్కుతోన్న పీరియాడికల్ యాక్షన్ అడ్వెంచర్ డ్రామా ''హరిహర వీరమల్లు''. ఇప్పటికే సగానికి పైగా చిత్రీకరణ జరుపుకున్న ఈ సినిమా షూటింగ్ ప్రస్తుతం హైదరాబాద్ అన్నపూర్ణ సెవన్ ఏకర్స్ లో వేసిన ప్రత్యేకమైన సెట్స్ లో జరుగుతోంది.

ఈ షెడ్యూల్ లో యాక్షన్ సీన్స్ తో పాటుగా ప్రధాన తారాగణం పాల్గొనే కీలక సన్నివేశాలను షూట్ చేస్తున్నారు. దీనికి సంబంధించిన వర్కింగ్ స్టిల్స్ ను చిత్ర బృందం ఎప్పటికప్పుడు సోషల్ మీడియా ద్వారా అభిమానులతో పంచుకుంటున్నారు. తాజాగా మరో పిక్ ని దర్శకుడు ఇన్స్టాగ్రామ్ లో షేర్ చేశారు

'హరిహర వీరమల్లు ఆ ఇంటెన్స్ టేక్ ని ఉద్వేగంగా చెక్ చేస్తున్నప్పుడు..' అని క్రిష్ దీనికి క్యాప్షన్ పెట్టారు. వీరమల్లు ఇంటెన్స్ టేక్ తర్వాత పవన్ మరియు క్రిష్ ఇద్దరూ మానిటర్ లో ఔట్‌ పుట్‌ ని ఆసక్తిగా చూస్తున్నారని అర్థం అవుతోంది. ఇందులో సినిమాటోగ్రాఫర్ జ్ఞానశేఖర్‌ ను కూడా చూడొచ్చు.

17వ శ‌తాబ్దం నాటి మొఘ‌లాయిలు - కుతుబ్ షాహీలకు సంబంధించిన కథతో ''హరి హర వీరమల్లు'' చిత్రాన్ని తెరకెక్కిస్తున్నట్లు తెలుస్తోంది. దీని కోసం హైదరాబాద్‌ లో అప్పటి కాలాన్ని ప్రతిబింబించేలా ఆర్ట్ డైరెక్టర్ తోట తరణి పర్యవేక్షణలో భారీ సెట్‌లు నిర్మించారు. సినిమా షూటింగ్ దాదాపుగా ఈ సెట్స్ లోనే జరుగుతోంది.

ఇప్పటికే విడుదలైన 'వీరమల్లు' ఫస్ట్ లుక్ - గ్లిమ్స్ మంచి రెస్పాన్స్ తెచ్చుకున్నాయి. పవన్ కళ్యాణ్ సరికొత్త లుక్ లో కనిపించి ఆకట్టుకున్నారు. ఇందులో పవన్ సరసన నిధి అగర్వాల్ హీరోయిన్ గా నటిస్తోంది. బాలీవుడ్ స్టార్స్ అర్జున్ రాంపాల్ - నర్గిస్ ఫక్రి కీలక పాత్రలు పోషిస్తున్నారు.

'హరి హర వీరమల్లు' పవన్ కళ్యాణ్ కెరీర్ లోనే భారీ బడ్జెట్ తో తెరకెక్కుతున్న సినిమా. పాన్ ఇండియా స్థాయిలో తెలుగుతో పాటు హిందీ, త‌మిళ‌, మ‌ల‌యాళం, కన్నడ భాష‌ల్లో విడుద‌ల చేయ‌నున్నారు.

సీనియర్ ప్రొడ్యూసర్ ఏఎమ్ రత్నం సమర్పణలో మెగా సూర్య ప్రొడక్షన్స్ బ్యానర్ పై ఎ. దయాకర్ రావు ఈ చిత్రాన్ని నిర్మిస్తున్నారు. ఎం.ఎం. కీర‌వాణి ఈ చిత్రానికి సంగీతం సమకూరుస్తుండగా.. రచయిత బుర్రా సాయిమాధవ్ సంభాషణలు రాశారు.