పుల్లలు ఏరుకెళ్తున్నావా పవర్ స్టార్?

పవన్ కళ్యాణ్ కొత్త సినిమా అజ్ఞాతవాసి రిలీజ్ కి ఇంకా ఒక్క రోజు గ్యాప్ మాత్రమే. ముందు రోజే ప్రీమియర్స్ వేసుకునేందుకు పర్మిషన్ వస్తే కనుక.. రేపు సాయంత్రానికి సినిమా థియేటర్లలోకి వచ్చేస్తుంది. పవర్ స్టార్ మూవీకి ఫుల్ రేంజ్ లో బజ్ ఉండడంతో.. అడ్వాన్స్ బుకింగ్స్ విపరీతంగా జరుగుతున్నాయి.

అయితే.. ఈ సినిమాలో పవర్ స్టార్ ఉన్నాడనే ఒక్క ఎలిమెంట్ తోనే ఇంతగా హంగామా జరిగిపోతోంది. నిజానికి అజ్ఞాతవాసిపై హైప్ పెంచేందుకు మేకర్స్ పెద్దగా ప్రయత్నించిన దాఖలాలు లేవు. థియేట్రికల్ ట్రైలర్ లాంఛ్ చేయడం కూడా ఏ మాత్రం ప్లానింగ్ లేకుండా జనాలను విసిగించిన సంగతి తెలిసిందే. అయితే.. మూవీ రిలీజ్ కి ఇంకా గంటల సమయం మాత్రమే ఉండగా.. అభిమానులు కౌంట్ డౌన్ టైమర్స్ ను కూడా రన్ చేస్తుండగా.. ఇప్పుడు పోస్టర్లను విడుదల చేస్తున్నారు నిర్మాతలు.

ఖుష్బూ ఓ బాక్స్ ఇస్తున్నట్లుగా ఉన్న పోస్టర్ ఆకట్టుకుంటే.. మరో పోస్టర్ లో బొమన్ ఇరానీతో కలిసి నడిచొస్తున్న పవన్ కనిపిస్తాడు. ఒక చేతిలో కొడవలి.. మరోచేతిలో అప్పటివరకూ ఏరుకొచ్చిన(నరికిన) పుల్లలు అన్నీ ఓ మోపుగా కట్టి భుజంపై మోసుకొస్తున్న పవర్ స్టార్ కనిపిస్తాడు. సహజత్వానికి అతి సన్నిహితంగా ఉన్న ఈ సీన్.. థియేటర్లలో ఎలా ఉంటుందో అని ఊహించుకుని ముచ్చటపడిపోతున్నారు ఫ్యాన్స్.