సమ్మర్ ని మెగా సీజన్ గా మార్చేశారే

ఈ సారి సమ్మర్ లో ఎండలు ఎలా ఉంటాయో కానీ.. మెగా ఫ్యాన్స్ కి మాత్రం పండగలాగానే ఉంది. వరుసపెట్టి మెగా ఫ్యామిలీ సినిమాలన్నీ సమ్మర్ కే షెడ్యూల్ చేసేశారు. ఎండాకాలం ప్రారంభం నుంచి చివరివరకూ మెగా వారసుల్లో ఏదో ఒక మూవీ విడుదల కానుండడం విశేషం.

ఏప్రిల్ 1న 'సుప్రీం' అంటూ సమ్మర్ ని స్టార్ట్ చేయనున్నాడు మెగా మేనల్లుడు సాయిధరం తేజ్. అనిల్ రావిపూడి డైరెక్షన్, దిల్ రాజు ప్రొడక్షన్ లో వస్తున్న ఈ మూవీపై అంచనాలు చాలానే ఉన్నాయి. సుప్రీం రిలీజ్ అయిన వారానికే పవన్ కళ్యాణ్ మూవీ 'సర్దార్ గబ్బర్ సింగ్' వచ్చేస్తోంది. టాలీవుడ్ రికార్డులన్నిటిపైనా గురిపెట్టిన మూవీ.. ఇండస్ట్రీ బిగ్గెస్ట్ రిలీజ్ లలో ఒకటి. బాబాయ్ పవన్ వచ్చిన రోజునే తను కూడా 'ఒక మనసు' అంటూ వస్తానంటోంది నీహారిక. మెగా డాటర్ అరంగేట్ర చిత్రం కోసం మెగా ఫ్యాన్స్ ఆసక్తిగా చూస్తున్నారు కూడా.

ఏప్రిల్ 28న అల్లు అర్జున్ నటించిన 'సరైనోడు' రిలీజ్ చేసే అవకాశాలున్నాయి. బోయపాటి శీను డైరెక్షన్ కావడంతో.. ఎక్స్ పెక్టేషన్స్ ఎక్కువే. ఇక ఆఖరిగా మే నెలలో అల్లు శిరీష్ నటించిన 'శ్రీరస్తు శుభమస్తు' విడుదల కానుంది. ఈ మెగా మూవీస్ కాకుండా విడుదలయ్యే సినిమాల్లో మొదట చెప్పుకోవాల్సింది మహేష్ బాబు 'బ్రహ్మోత్సవం'గురించే. కానీ ఈ మూవీ మే నెల చివర్లో రానుండడంతో పోటీ ఉండకపోవచ్చు. కానీ త్రివిక్రమ్ శ్రీనివాస్ దర్శకత్వంలో నితిన్ సమంత జంటగా నటించిన 'అ..ఆ..' మాత్రం ఏప్రిల్ లోనే విడుదల కానుంది. ఇదొక్కటే మెగా మూవీస్ మధ్య ఇబ్బంది పడే అవకాశాలున్న సినిమా అంటున్నారు సినీ జనాలు.