మెగా జోక్ మరిచిపోగలామా

పెద్దాయన,సీనియర్ నిర్మాత, ప్రజా ప్రతినిధి డాక్టర్ టి.సుబ్బరామిరెడ్డి గారు ఆ ప్రకటన చేసినప్పుడు ఎవరికి నమ్మాలి అనిపించలేదు. పరిశ్రమలో ఉన్న ప్రతి ఒక్క హీరోతో ఆయనకు సత్సంబంధాలు ఉన్నా సరే అంత నమ్మశక్యంగా అనిపించలేదు.ఇది దేని గురించి అనుకుంటున్నారా. 2017 సంవత్సరంలో అత్యంత ఆసక్తి రేపిన వార్తల్లో ఒకటిగా నిలిచిన మెగాస్టార్-పవర్ స్టార్ మల్టీ స్టారర్ గురించి. చిరంజీవి - పవన్ కళ్యాణ్ ఒకే సినిమాలో నటిస్తూ వెండితెరపై కనిపించాలని ప్రతి మెగా అభిమాని కోరిక. కాని దాన్ని అమలు చేసే దర్శకుడు కాని నిర్మాత కాని టాలీవుడ్ లో దొరకలేదు. దీంతో సుబ్బరామి రెడ్డి గారు ఆ మాట అన్నప్పుడు కొందరు ఫాన్స్ నమ్మేసారు. అది కూడా త్రివిక్రమ్ దర్శకత్వంలో అనేసరికి వాళ్ళ ఆనందానికి హద్దులు లేకుండా పోయాయి.

కాని అదంతా ఉత్తి గ్యాస్ వార్తే అని తర్వాత తెలిసే సరికి అందరు ఉస్సూరన్నారు. పైగా చిరు - పవన్ దీని గురించి ఎక్కడా మాట వరసకు కూడా మాట్లాడకపోవడం అనుమానాలను ఇంకా పెంచింది. అసలు చిరు - పవన్ లకే కలిసి నటించాలి అని బలంగా లేనప్పుడు సుబ్బరామిరెడ్డి ఎంత ప్రయత్నించినా అది జరిగే పని కాదు అనే కామెంట్స్ ఉన్నప్పటికీ ఇద్దరి ఇమేజ్ కి సరితూగగల కథ దొరకాలి కదా అని ఫాన్స్ సర్ది చెప్పుకున్నారు. అయితే ఇద్దరినీ సిల్వర్ స్క్రీన్ పై చూసుకునే ఛాన్స్ మాత్రం గతంలో ఒకే ఒక్కసారి దక్కింది. శంకర్ దాదా జిందాబాద్ సినిమాలో క్లైమాక్స్ ఫైట్ లో పవన్ కాసేపు కనిపించి సందడి చేస్తాడు. దాని తర్వాతే చిరు రాజకీయాల్లోకి వచ్చారు. మొత్తానికి ఈ మెగా జోక్ ని మాత్రం తాము మర్చిపోలేమని ఫాన్స్ ఇప్పటికీ అంటూ ఉంటారు.