వారణాసికి అజ్ఞాతవాసి!!

వచ్చే ఏడాది సంక్రాంతి రేసులో ఉన్న సినిమాల్లో బాగా బజ్ ఉన్నవాటిలో పవన్ కళ్యాణ్ సినిమా అజ్ఞాతవాసి కూడా ఉంది. ఇండస్ట్రీ రికార్డ్ సాధించిన అత్తారింటికి దారేది సినిమా తీసిన త్రివిక్రమ్ శ్రీనివాస్ - పవన్ కళ్యాణ్ కాంబినేషన్ లో వస్తున్న సినిమా కావడం.. పవర్ స్టార్ కు 25వ సినిమా కావడంతో ఈ మూవీపై అభిమానుల్లో విపరీతమైన ఆసక్తి నెలకొంది.

రిలీజ్ డేట్ దగ్గరవడంతో పవన్ - త్రివిక్రమ్ లు సినిమా షూటింగ్ కు సంబంధించిన పనుల్లో స్పీడు పెంచారు. ఇప్పటికే చిత్ర యూనిట్ యూరప్ టూర్ కు వెళ్లివచ్చింది. తరవాత హైదరాబాద్ లోనూ కొన్ని సన్నివేశాలు చిత్రీకరించారు. దాదాపుగా షూటింగ్ కొలిక్కి వచ్చిందని అంతా అనుకుంటున్నా ఇంపార్టెంట్ షెడ్యూల్ ఒకటి ఇంకా పెండింగ్ లోనే ఉంది. దీనిని పూర్తి చేయడానికి ఈ చిత్ర యూనిట్ ఉత్తర భారత్ కు బయలుదేరనుంది. పవన్ పై వారణాసి - అలహాబాద్ వంటి పుణ్య క్షేత్రాల్లో కొన్ని కీలక సన్నివేశాలు చిత్రీకరిస్తారు. ఈ షెడ్యూల్ పూర్తయితే సినిమా షూటింగ్ దాదాపుగా పూర్తయిపోయినట్టే. కొద్దిరోజుల్లోనే యూనిట్ వారణాసికి బయలుదేరి వెళ్లనుంది.

ఈ మూవీలో మెయిన్ హీరోయిన్ గా కీర్తి సురేష్ నటిస్తుండగా.. అను ఇమ్మానుయేల్ సెకండ్ హీరోయిన్ గా కనిపించనుంది. ఈ సినిమాకు అజ్ఞాతవాసి అనే పేరును చిత్ర యూనిట్ ఇంకా అఫీషియల్ కన్ఫర్మ్ చేయలేదు. మిగిలిన అన్ని పనులు పూర్తి చేసి డిసెంబర్ 15 నాటికి ఆడియో రిలీజ్ చేసే ఏర్పాట్లలో ఉన్నారు. అనిరుధ్ రవిచందర్ తొలిసారి పవన్ సినిమాకు మ్యూజిక్ అందిస్తున్నాడు.