శిష్యుడితో పవన్ మూవీ మొదలవుతోంది

హీరో నితిన్ పవర్ స్టార్ పవన్ కళ్యాణ్ కు వీరాభిమాని. అవకాశం ఉన్న ప్రతిసారీ ఆ మాట నితిన్ బహిరంగంగానే చెబుతుంటాడు. పవన్ ఇన్ స్పిరేషన్ గా తీసుకునే ఇండస్ట్రీకి వచ్చానని కూడా చాలాసార్లు చెప్పాడు. పవన్ కళ్యాణ్ సూపర్ హిట్ ఫిలిం తొలిప్రేమ సినిమాలోని ‘ఏమైందో ఏమో ఈ వేళ’ పాట రీమిక్స్ చేసి మరీ తన సినిమాలో వాడాడు. ఇలా సందర్భం వచ్చిన ప్రతిసారీ తన అభిమానాన్ని చాటుకుంటూనే ఉన్నాడు. తనను ఇంతగా అభిమానించే శిష్యుడు నితిన్ తో సినిమా తీస్తున్నాడు. తన ఫ్రెండ్ అండ్ డైరెక్టర్ త్రివిక్రమ్ శ్రీనివాస్ తో కలిసి నితిన్ సినిమాకు ప్రొడ్యూసర్ గా వ్యవహరిస్తున్నాడు.

త్రివిక్రమ్ డైరెక్షన్ లో వచ్చిన అ..ఆ సినిమా సూపర్ హిట్ తర్వాత కాస్త గ్యాప్ తీసుకుని నితిన్ లై సినిమా చేస్తున్నాడు. కృష్ణగాడి వీరప్రేమ గాథ ఫేం డైరెక్టర్ హను రాఘవపూడి తీస్తున్న ఈ సినిమా నితిన్ కెరీర్ లోనే హైబడ్జెట్ తో తెరకెక్కుతోంది. ఈ సినిమా షూటింగ్ ఫైనల్ స్టేజ్ కు వచ్చింది. జూన్ 14 నాటికి యూఎస్ లో లాస్ట్ షెడ్యూల్ పూర్తి చేయనున్నారు. అది పూర్తి కాగానే నితిన్ ఇండియాకు తిరిగి వస్తాడు. వెంటనే లిరిక్ రైటర్ కృష్ణ చైతన్య డైరెక్షన్ లో నెక్ట్స్ ఫిలిం చేయనున్నాడు. ఈ సినిమాకు పవన్ కళ్యాణ్, త్రివిక్రమ్ జాయింట్ ప్రొడ్యూసర్స్ అనే సంగతి తెలిసిందే. రొమాంటిక్ ఎంటర్ టెయినర్ గా తీస్తున్న ఈ సినిమా కథకు సంబంధించిన బేసిక్ ప్లాట్ కూడా త్రివిక్రమ్ శ్రీనివాసే రాశాడు. జూన్ 26 నుంచి రెగ్యులర్ షూటింగ్ స్టార్టవుతుందని తెలుస్తోంది.

పవన్ కళ్యాణ్ ప్రొడ్యూసర్ గా ఇంతవరకు సొంత సినిమాలే తప్ప బయట హీరోలతో ఒక్క సినిమా కూడా చేయలేదు. అదే సమయంలో తన క్లోజ్ ఫ్రెండ్ త్రివిక్రమ్ తో కలిసి సిినిమా ప్రొడ్యూస్ చేయలేదు. నితిన్ తో తీస్తున్న సినిమాలో ఈ అరుదైన కాంబినేషన్ వర్కవుట్ చేస్తున్నారు. ఎంతైనా నితిన్ పవన్ కు వీరాభిమాని కదా.

Like Us on Facebook : https://www.facebook.com/Tupakidotcom/