మరి పవన్ కరుణిస్తాడా?

గబ్బర్ సింగ్-2 నుంచి సంపత్ నంది ఎందుకు తప్పుకున్నాడు..? ఈ ప్రశ్నకు సమాధానం ఎవ్వరికీ తెలియదు. స్క్రిప్టు విషయంలో పవన్ అంచనాలకు తగ్గట్లు సంపత్ పని చేయలేకపోయాడన్నది అందరూ అంచనా వేస్తున్న సంగతి. మామూలుగా ‘గబ్బర్ సింగ్-2’ విషయంలో తనకు జరిగిన నష్టం ప్రకారం చూస్తే సంపత్ పవన్ మీద చాలా ఆగ్రహంగా ఉండాలి. కానీ సంపత్ మాత్రం పవర్ స్టార్‌ ను ఇప్పటికీ దేవుడిలా కొలుస్తున్నాడు. గబ్బర్ సింగ్-2 తప్పిపోయాక చేసిన ‘బెంగాల్ టైగర్’లో పవన్ మీద తన భక్తినంతా చాటుకున్నాడు.

పవన్‌ తో సినిమా చేసి తీరుతా అని నొక్కి వక్కాణిస్తున్న సంపత్.. ఆ దిశగా తాను చేయాల్సిందంతా చేశాడు. సినిమాలో పవన్ కళ్యాణ్ మీద తన అభిమానాన్ని చాటుకున్నాడు. మరోవైపు సినిమాను హిట్ చేసి.. మరోసారి తన సత్తా ఏంటో చూపించాడు. ఇప్పుడతను హ్యాట్రిక్ డైరెక్టర్. పరిశ్రమలో ఈ ఘనత చాలా కొద్దిమందికే దక్కుతుంది. పైగా ‘ఏమైంది ఈవేళ’ లాంటి లవ్ స్టోరీతో ప్రయాణం ఆరంభించి.. తర్వాత వరుసగా రెండు మాస్ హిట్స్ ఇవ్వడం.. ఆ రెండు సార్లూ తనమీద జనాలకు చాలా సందేహాలున్నా పట్టించుకోకుండా సినిమాలు తీయడం, విజయవంతం చేయడం చిన్న విషయం కాదు. మొత్తానికి పవన్ తో సినిమా చేయడానికి తాను అన్ని విధాలా అర్హుడినని సంపత్ చాటుకున్నాడు. హీరోకు వీరాభిమాని అయిన దర్శకుడు సినిమా తీస్తే ఎలా ఉంటుందో ‘గబ్బర్ సింగ్’ ద్వారా హరీష్ శంకర్ చూపించాడు. పవన్ మీద అభిమానంలో సంపత్ ఏమాత్రం తీసిపోడు. పైగా తన డైరెక్టర్ గా తనేంటో ప్రూవ్ చేసుకున్నాడు కూడా. మరి పవన్ అతణ్ని కరుణించి.. దర్శకుడిగా అవకాశమిస్తాడా?