కామన్ డీపీ అంటూ పవన్ ఫ్యాన్స్ రచ్చ

మరో నాలుగు రోజుల్లో పవన్ కళ్యాణ్ పుట్టిన రోజు వస్తోంది. సెప్టెంబర్ 2న పవర్ స్టార్ బర్త్ డే కావడంతో.. ఇప్పటికే అభిమానులు ఓ రేంజ్ లో హంగామా చేసేస్తున్నారు. గతంలో అయితే.. ఏ రక్తదానాలో.. అన్నదానాలో చేసి తమ అభిమానాన్ని చాటుకునేవారు ఫ్యాన్స్.

కానీ ఇప్పుడు టెక్నాలజీ అందుబాటులోకి వచ్చింది. పైగా పక్క హీరోల ఫ్యాన్స్ తో పోటీ పెరిగిపోయింది. ప్రతీ విషయంలో తెగ కాంపిటీషన్ ఎదుర్కోవాల్సి వస్తోంది. అందుకే తమ అభిమానం చాటుకునేందుకు కొత్త కొత్త కాన్సెప్టులను కనిపెట్టేస్తున్నారు.. లేకపోతే అరువు తెచ్చేసుకుంటున్నారు. ఇప్పుడు పవన్ ఫ్యాన్స్ స్టార్ట్ చేసిన కొత్త కల్చర్ కామన్ డీపీ. పవన్ కళ్యాణ్ రకరకాల స్టిల్స్ తో ఓ పోస్టర్ తయారు చేసి.. దాన్ని సెప్టెంబర్ 2న కామన్ డీపీగా పవన్ ఫ్యాన్స్ అందరూ పెట్టుకోవాలంటూ తెగ షేరింగ్ చేసేస్తున్నారు. నిజానికి పవన్ కు చెందిన ఈ పోస్టర్ సూపర్ గానే ఉంది. సినిమాల నుంచి పాలిటిక్స్ వరకు.. రీల్ లైఫ్ నుంచి రియల్ లైఫ్ వరకూ.. ఏరి కోరి ఎంపిక చేసిన పిక్స్ నే ఉపయోగించారు.

అయితే.. ఈ కామన్ డీపీ రచ్చే మరీ ఎక్కువయిపోతోంది. పవన్ బర్త్ డే నాటికి ఫ్యాన్స్ అందరికీ ఈ విషయం చేరాలనే ఉద్దేశ్యంతో.. ఒక్కొక్కరు పదుల కొద్దీ పోస్టులు పెట్టేసి హంగామా చేసేస్తున్నారు. ఈ దెబ్బతో సోషల్ మీడియా అంతా ఆ కామన్ డీపీ పోస్టర్ చక్కర్లు కొట్టేస్తోంది. ఈ విషయంలో ఏదైనా కొత్త రికార్డు సృష్టించాలనే టార్గెట్ ఏదైనా సెట్ చేసుకున్నట్లు కనిపిస్తోంది. కానీ.. ఒకటే పోస్టర్ తో జరుగుతున్న ఈ హంగామా మాత్రం ఇతరులకు బాగా విసుగు తెప్పించేస్తోంది.