పవర్ స్టార్ మూవీకి పోటీగా 'పరాన్నజీవి'...!

కాంట్రవర్సీకి కేరాఫ్ అడ్రెస్ గా నిలిచే రామ్ గోపాల్ వర్మ ఎప్పుడు ఎవరిని ఏ రకంగా గిల్లుతాడో ఎవరికీ అర్థం కాదు. ఎప్పుడు ఏదో ఒక ఇష్యూ మీద మాట్లాడటం దాన్ని వివాదాస్పదం చేయడం వర్మ నుంచే చూసి నేర్చుకోవాలి. తనకు గిట్టని వాళ్లపై ఏదో కామెంట్స్ చేస్తూ వార్తల్లో నిలవడం వర్మకు ముందు నుంచి ఉన్న అలవాటే. ఇక మెగా ఫ్యామిలీని టార్గెట్ చేస్తూ ముందునుంచి కూడా వర్మ సెటైరికల్ కామెంట్స్ చేస్తూ వస్తున్నారు. ముఖ్యంగా చిరంజీవి - పవన్ కళ్యాణ్ - నాగబాబు లపై ప్రత్యక్ష పరోక్ష ట్వీట్స్ చేస్తూ మెగా అభిమానుల ఆగ్రహానికి గురవుతుంటారు. ఈ క్రమంలో ఇప్పుడు మరోసారి పవన్ కళ్యాణ్ ని టార్గెట్ చేశారు ఆర్జీవీ. 'పవర్ స్టార్' అనే పేరుతో సినిమా తీశాడు. ఈ సినిమా నిజ జీవితంలోని ఏ వ్యక్తికి సంబందించింది కాదు అంటూనే పవర్ స్టార్ పవన్ కళ్యాణ్ ని పోలిన నటుడిని హీరోగా సెలెక్ట్ చేసుకున్నాడు. ఇప్పటికే ఫస్ట్ లుక్ రిలీజ్ చేసిన వర్మ తాజాగా 'గడ్డి తింటావా' అనే సాంగ్ కూడా రిలీజ్ చేశాడు. దీనిపై మెగా ఫ్యామిలీ నుండి ఎవరూ స్పందించకపోయినా పవన్ కళ్యాణ్ ఫ్యాన్స్ మాత్రం సోషల్ మీడియా వేదికగా వర్మపై తీవ్ర స్థాయిలో విరుచుకుపడుతున్నారు. ఇక వర్మ "పవర్ స్టార్" సినిమా జూలై 25న ఆర్జీవీ వరల్డ్ థియేటర్ లో రిలీజ్ చేస్తున్నట్లు ప్రకటించారు.

ఇదిలా ఉండగా రామ్ గోపాల్ వర్మ చర్యలు మెగా ఫ్యాన్స్ కి బాగా కోపం తెప్పిస్తున్నాయట. ఇలా ప్రతి దానికి మెగా హీరోలను టార్గెట్ చేస్తుండటం.. ఇప్పుడు ఏకంగా పవర్ స్టార్ పవన్ కళ్యాణ్ పై సెటైరికల్ సినిమా తీస్తుండటంతో దీన్ని వారు సీరియస్ గా తీసుకున్నారట. ఈ క్రమంలో ఆంధ్రప్రదేశ్ కి చెందిన కొందరు మెగా ఫ్యాన్స్ కలిసి వర్మ కి కౌంటర్ గా మూవీ తీయాలని డిసైడ్ అయ్యారట. ఈ క్రమంలో 'పరాన్నజీవి' అనే సినిమాని తెరకెక్కిస్తున్నారు. షూటింగ్ జరుపుకుంటున్న ఈ సినిమాని "పవర్ స్టార్" కి పోటీగా రిలీజ్ చేయాలని ప్లాన్ చేస్తున్నారట. ఇక "PARANNAGEEVI" టైటిల్ పోస్టర్ లో 'R G V' లెటర్స్ హైలైట్ అయ్యేలా డిజైన్ చేశారు. అంతేకాకుండా దీనికి ' Reckless Genetic Virus' అనే ట్యాగ్ లైన్ కూడా పెట్టారు. మరి రామ్ గోపాల్ వర్మకి కౌంటర్ ఇవ్వడానికి తీస్తున్న "పరాన్నజీవి" సినిమా ఏమాత్రం ప్రభావం చూపుతుందో చూడాలని సినీ అభిమానులు ఆసక్తిగా ఎదురుచూస్తున్నారు. ఇక ఈ సినిమాని యూట్యూబ్ లో రిలీజ్ చేస్తున్నారని సమాచారం. మరోవైపు వర్మ మాత్రం ఇలాంటివేమీ పట్టించుకోకుండా "పవర్ స్టార్" బిజినెస్ చేసుకునే పనిలో పడ్డారు.