అమీర్‌ని ఫాలో అవుతున్న పీకే

ప‌వ‌ర్ స్టార్ ప‌వ‌న్‌ క‌ల్యాణ్‌ లో ఇటీవ‌లి కాలంలో ఓ అనూహ్య మార్పు గ‌మ‌నించారా? అత‌డు ఎక్క‌డికి వెళ్లినా ఖాకీ ధ‌రించి క‌నిపిస్తున్నాడు. షూటింగ్ స్పాట్ నుంచి వ‌చ్చేప్పుడు డ్రెస్ మార్చేయాలి.. అన్న సెన్స్ అత‌డికి లేక‌పోవ‌డం వ‌ల్ల అలా చేస్తున్నాడ‌ని అంతా అనుకుంటే త‌ప్పులో కాలేసిన‌ట్టే. అదంతా ప్ర‌మోష‌న్ స్ర్టాట‌జీ. ప‌వ‌ర్‌ స్టార్ ఇప్పుడు బాలీవుడ్ మిస్ట‌ర్ పెర్ ఫెక్ట్ అమీర్‌ ఖాన్‌ ని ఫాలో అవుతున్నాడు.

అమీర్ అదే త‌ర‌హాలో త‌న సినిమా షూటింగులో ఉండ‌గా ఏ డ్రెస్‌ లో ఏ గెట‌ప్‌ లో ఉంటాడో అదే గెట‌ప్‌ తో ప‌బ్లిక్ అప్పియ‌రెన్స్ ఇస్తుంటాడు. ఇప్పుడు ప‌వ‌న్ చేసింది కూడా అదే. ఇప్ప‌టికే ప‌లుమార్లు ఖాకీ చొక్కా ధ‌రించి ప‌బ్లిక్‌ లో క‌నిపించాడు. మొన్న‌టి రోజున అన్న‌య్య చిరంజీవిని, కొడుకు చ‌ర‌ణ్‌ని క‌లిసేందుకు జూబ్లీ హిల్స్‌ లోని చిరంజీవి ఇంటికి వెళ్లిన‌ప్పుడు కూడా ఖాకీలోనే క‌నిపించాడు. ఇలా చేయ‌డానికి కార‌ణం స‌ర్ధార్ గ‌బ్బ‌ర్‌ సింగ్ ప్ర‌మోష‌న్ కోస‌మేన‌ని అంతా విశ్లేషిస్తున్నారు.

అయితే స‌ర్ధార్ గ‌బ్బ‌ర్‌ సింగ్ షూటింగ్ ప్ర‌స్తుతం న‌త్త న‌డ‌క‌న సాగుతోంది. జ‌య‌న‌న్ విన్సెంట్‌ తో బాబి గొడ‌వ‌ప‌డ్డాక .. ప‌వ‌న్‌తో డిఫ‌రెన్సెస్ వ‌చ్చాక సినిమాటోగ్రాఫ‌ర్ మారారు. నాటి నుంచి కేవ‌లం రెండు యాక్ష‌న్ సీన్లు, ఓ సాంగ్ సీక్వెన్స్ మాత్ర‌మే తెర‌కెక్కించారు. అయితే ఎట్టి ప‌రిస్థితిలో వ‌చ్చే సంక్రాంతికి ప‌వ‌న్ సినిమాని పూర్తిచేసి రిలీజ్ చేయాల‌న్న‌ది ప్లాన్‌.