ప‌వ‌న్ ఫోన్ చేసి మ‌రీ...!

త‌న‌వాళ్ల‌యినా వేరొక‌ర‌యినా వాళ్ల టాలెంటు మ‌న‌సుకు న‌చ్చిందంటే త‌ప్ప‌కుండా ప్రోత్స‌హిస్తాడు ప‌వ‌న్‌ క‌ళ్యాణ్‌. మా కుటుంబంలోనే బోలెడుమంది హీరోలున్నారు క‌దా, వాళ్ల‌ని మాత్ర‌మే ఎంక‌రేజ్ చేద్దాం అన్న ధోర‌ణి ప‌వ‌న్‌ లో ఎప్పుడూ క‌నిపించ‌దు. నితిన్‌ లాంటి హీరో ఆడియో కైనా హాజ‌ర‌వుతుంటాడు కానీ... సొంత అన్న‌య్య కొడుకు వ‌రుణ్‌ తేజ్ ఆడియో వేడుక‌కి మాత్రం ప‌వ‌న్ హాజ‌రు కాలేదు. నిజాయ‌తీగా క‌ష్ట‌ప‌డండి, ప్రేక్ష‌కులు ఆద‌రిస్తారని త‌న ఇంట్లో క‌థానాయ‌కుల‌కు చెబుతుంటాడు ప‌వ‌న్‌.

అబ్బాయ్ వ‌రుణ్‌ తేజ్‌ కీ, మేన‌ల్లుడు సాయిధ‌ర‌మ్ తేజ్‌ కీ న‌ట‌న‌లో శిక్ష‌ణ తీసుకొనే విష‌యంలో స‌ల‌హాలు ఇచ్చాడు మిన‌హా వాళ్ల గురించి ప్ర‌త్యేకంగా శ్ర‌ద్ధ తీసుకొన్న‌ది లేదు. కానీ వారిద్ద‌రూ త‌మ సినిమాల‌తో నిరూపించుకొనే ప్ర‌య‌త్నం చేస్తున్నారు. అందుకే ఆ ఇద్ద‌రి విష‌యంలో ప‌వ‌న్ చాలా హ్యాపీగా ఉన్నాడ‌ట‌. ఇటీవ‌ల వ‌రుణ్‌ తేజ్ `కంచె` అనే చిత్రంలో న‌టించాడు. క్రిష్ ద‌ర్శ‌క‌త్వం వ‌హించిన ఆ చిత్రం అక్టోబ‌రులో ప్రేక్ష‌కుల ముందుకొస్తుంది. ఆ సినిమా టీజ‌ర్‌ ని ఇటీవ‌లే విడుద‌ల చేశారు. దాన్ని చూసి ప‌వ‌న్ చాలా ఖుషీ అయ్యాడ‌ట‌. వెంట‌నే వ‌రుణ్‌ తేజ్‌ కి ఫోన్ చేసి మ‌రీ `నీకు త‌గ్గ క‌థ‌ని ఎంచుకొన్నావు, కీప్ ఇట్ అప్‌` అని మెచ్చుకొన్నాడ‌ట‌.

బాబాయ్ నుంచి కితాబు రావ‌డంతో అబ్బాయ్ వ‌రుణ్‌ తేజ్ ఆనందానికి అవ‌ధుల్లేవట‌. త‌న స‌న్నిహితుల‌తో బాబాయ్ ఫోన్ చేసి మాట్లాడిన విషయాన్ని వ‌రుణ్ తేజ్ ప‌దే ప‌దే చెప్పుకొంటూ ఆనందిస్తున్నాడు. త్వ‌ర‌లోనే సినిమాలోని మ‌రికొన్ని స‌న్నివేశాల్ని ప‌వ‌న్‌ కి చూపించబోతున్నార‌ని స‌మాచారం. స్వాతంత్ర్యానికి పూర్వం సాగే క‌థ‌తో `కంచె` తెర‌కెక్కింది. అందులో వ‌రుణ్‌ తేజ్ లుక్ ప్రామిసంగ్‌ గా అనిపిస్తోంది. అదే ప‌వ‌న్‌ కి న‌చ్చుంటుంది. ``నా ఆలోచ‌న‌ల‌కు త‌గ్గ క‌థ‌ని ఎంచుకొన్నాడు వ‌రుణ్‌. టీజ‌ర్ చూశాక అస‌లు వీడు మ‌న వ‌రుణ్ తేజేనా అనిపించింద‌ని అక్క‌డున్న త‌న స‌న్నిహితుల‌తో ప‌వ‌న్ చెప్పాడ‌ట‌.