పవన్.. శ్రుతిని ఎందుకు ఎత్తుకోలేదు?

‘కాటమరాయుడు’ సినిమా తమిళ హిట్ మూవీ ‘వీరం’ రీమేక్ అన్న సంగతి ముందు నుంచి ప్రచారంలో ఉంది. కానీ చిత్ర బృందం మాత్రం అలాంటిదేమీ లేదంటూ మొదట్లో బుకాయించింది. కానీ ఈ మధ్య జనాలకు ఈ విషయంలో ఫుల్ క్లారిటీ వచ్చేసింది. స్వయంగా హీరోయిన్ శ్రుతి హాసనే ఇది ‘వీరం’ రీమేక్ అని స్పష్టం చేసింది. మొన్నటి టీజర్ చూసినా ఇది తమిళ రీమేకే అన్న విషయం స్పష్టమైపోతుంది.

‘కాటమరాయుడు’ రీమేక్ అని కన్ఫమ్ అయ్యాక పవన్ అభిమానులందరూ ఒకసారి ‘వీరం’ మీద ఒక లుక్ వేస్తున్నారు. సినిమా వచ్చాక ఒరిజినల్ తో అందరూ పోల్చి చూస్తారనడంలో సందేహం లేదు. ఐతే తమిళంతో పోలిస్తే తెలుగులో చాలా మార్పులు చేసినట్లుగా చిత్ర బృందం చెబుతోంది. మిగతా మార్పుల సంగతేమో కానీ.. ఇంటర్వెల్ ముంగిట వచ్చే యాక్షన్ ఎపిసోడ్లో మాత్రం కీలకమైన మార్పుల జరిగినట్లు సమాచారం.

తమిళంలో ఆ యాక్షన్ ఎపిసోడ్లో భాగంగా రౌడీలు తమన్నాపై అటాక్ చేయడంతో ఆమె గాయపడుతుంది. హీరో అజిత్ ఆమెను ఎత్తుకుని ఆసుపత్రికి వెళ్తాడు. కానీ తెలుగులో ఈ సీన్ మార్చేశారట. హీరోయిన్ శ్రుతిని పవన్ ఎత్తుకునే సీన్ ఏమీ ఇందులో లేదట. పవన్ స్వయంగా ఈ మార్పు చేయించినట్లు సమాచారం. శ్రుతిని ఎత్తుకోవడానికి పవన్ ఏమీ సిగ్గుపడిపోలేదట. చాన్నాళ్లుగా తనను నడుం నొప్పి వేధిస్తున్న నేపథ్యంలో హీరోయిన్ని ఎత్తుకుని అంత దూరం నడిచే సీన్ చేస్తే నొప్పి ఎక్కువవుతుందని పవన్ భావించి ఈ సీన్ అవాయిడ్ చేసినట్లు సమాచారం.

Like Us on Facebook : https://www.facebook.com/Tupakidotcom/