పవన్ వెనక్కు ఇస్తాడా?

నిన్న జనసేన తరఫున పవన్ కళ్యాణ్ ఇచ్చిన ప్రకటనతో రీ ఎంట్రీ గురించిన ప్రచారానికి చెక్ పడిపోయింది. రాజకీయ జీవితంలో బిజీగా ఉన్నాను కాబట్టి సినిమాలు చేసే ఛాన్స్ లేదని పవన్ తెగేసి చెప్పడంతో అభిమానులు కూడా క్లారిటీ తెచ్చేసుకుని దానికి ఫుల్ స్టాప్ పెట్టారు. కాని పవన్ గతంలోనే మాట ఇచ్చిన అడ్వాన్సు తీసుకున్న నిర్మాతలకు భవిష్యత్తులోనైనా సినిమా చేస్తాడా అనే అనుమానాలు మాత్రం కొనసాగేలా ఉన్నాయి. ముఖ్యంగా మైత్రి మూవీ మేకర్స్ తో పవన్ కాటమరాయుడు టైంలోనే కొంత మొత్తం తీసుకున్నాడు.

ఆ తర్వాత వేరే కమిట్మెంట్స్ పూర్తి చేయడం ఈలోపు జనసేన పూర్తి స్థాయి రాజకీయ కార్యకలాపాల్లో బిజీ కావడంతో మైత్రికి ఇచ్చిన మాట నిలబెట్టుకోలేకపోయాడు. కందిరీగ ఫేం సంతోష్ శ్రీనివాస్ దీని కోసం తమిళ హిట్ తేరిని తెలుగుకు అనుగుణంగా సిద్ధం చేసి ఉంచాడు. ఇప్పుడు పవన్ ఇచ్చిన ప్రకటనతో ఇక సినిమాలు చేయడం లేదనే స్పష్టత వచ్చేసింది. మరి మైత్రి అడ్వాన్సు వెనక్కు ఇస్తాడా అనే విషయం మాత్రం ఇంకా సస్పెన్స్ గానే కొనసాగుతుంది.

ఆ మధ్య సవ్యసాచి ప్రమోషన్లో దీని ప్రస్తావన వచ్చినప్పుడు ఆయనకు ఇచ్చిన అడ్వాన్సు వెనక్కు తీసుకోమని పవన్ ఎప్పుడు రీ ఎంట్రీ ఇచ్చినా తమకు సినిమా చేస్తారని అప్పటి దాకా వేచి చూస్తామని మైత్రి నిర్మాతలు చెప్పిన సంగతి తెలిసిందే.

మరి రాం తాళ్లూరికి సైతం ఓ మాట ఇచ్చారనే టాక్ బలంగా ఉంది. సో పవన్ ఎప్పుడు సినిమాలకు తిరిగి వచ్చినా ఈ రెండు చేస్తాడా లేక చిరంజీవి తరహాలో కొన్నేళ్ల గ్యాప్ తర్వాత రీ ఎంట్రీ ఇస్తాడా అనే సస్పెన్స్ ఇంకొంత కాలం కొనసాగక తప్పదు.