పవన్ మూవీ రిలీజ్ డేట్ కూడా ఫిక్స్ చేశారా?

సినిమాలకు గుడ్ బై చెప్పేసి.. పూర్తిస్థాయి రాజకీయాల మీద ఫోకస్ పెట్టిన జనసేన అధినేత పవన్ కల్యాణ్ తాజాగా బాలీవుడ్ హిట్ మూవీ పింక్ తెలుగు రీమేక్ లో నటిస్తున్నారా? అంటే అవునన్న మాట వినిపిస్తున్న విషయం తెలిసిందే. ఆ మధ్యన ఒక ఇంటర్వ్యూలో ప్రముఖ నిర్మాత దిల్ రాజు ఈ విషయాన్ని కన్ఫర్మ్ చేయటంతోపాటు.. పవన్ తో సినిమా తీయాలన్న కల నెరవేరుతుందని చెప్పుకొచ్చారు.

ఈ నెల 20న ఈ సినిమా సెట్స్ మీదకు వెళుతున్నప్పటికీ.. ఫిబ్రవరిలో కానీ పవన్ షూటింగ్ షెడ్యూల్ స్టార్ట్ కాదంటున్నారు. ఈ సినిమా కోసం కేవలం పవన్ కేవలం 20 రోజులు మాత్రమే కాల్షీట్లు ఇచ్చినట్లుగా ప్రచారం సాగుతోంది. ఇదిలా ఉంటే.. ఈ సినిమా షూట్ ఇప్పటివరకూ ప్రారంభం కాకున్నా.. రిలీజ్ డేట్ కు సంబంధించిన వివరాలు బయటకు రావటం ఆసక్తికరంగా మారింది.

దిల్ రాజు.. బోనీకపూర్ కలిసి నిర్మిస్తున్న ఈ చిత్రానికి వేణు శ్రీరామ్ దర్శకత్వం వహిస్తున్నారు. తమన్ సంగీతాన్ని అందిస్తున్నాడు. అయితే.. తాను చేస్తున్న సినిమా గురించి పవన్ ఇప్పటివరకూ మాట్లాడింది లేదు. ఈ సినిమా కోసం అన్నపూర్ణ స్టూడియోలో భారీ కోర్టు సెట్ వేస్తున్నారు. సినిమా ఎక్కువ శాతం షూటింగ్ కోర్టు హాల్లోనే పూర్తి చేయనున్నారు. వేగంగా ఈ సినిమా చిత్రీకరణ సాగుతుందని.. మే 23న ఈ సినిమాను విడుదల చేయాలన్న ఆలోచనలో ఉన్నట్లు చెబుతున్నారు. ఒకవిధంగా చూస్తే.. కొంత గ్యాప్ తర్వాత పవన్ నటిస్తున్న ఈ చిత్రం మీద అంచనాలు భారీగా ఉన్నాయి. 'అజ్ఞాత‌వాసి' దారుణ పరాజయం తర్వాత పవన్ సినిమాలు చేయలేదు. మరి.. తాజా రీమేక్ తో తానేమిటో చూపిస్తారా? అన్నది ఒక ప్రశ్న.

పవన్ సినిమా అన్న తర్వాత కాసిన్ని ఫైట్లు.. ఒకట్రెండు పాటలు లేకపోతే బాగుండదు కాబట్టి.. అందుకు తగ్గట్లుగా పింక్ ఒరిజినల్ చిత్రంలోని కొంత మార్పులు చేసి.. పవన్ కు అనుగుణంగా కథను సిద్ధం చేసినట్లు సమాచారం. మొత్తానికి క్లాప్ కొట్టకుండానే సినిమా రిలీజ్ డేట్ బయటకు రావటం టాలీవుడ్ లో ఇదే తొలిసారి అని చెప్పక తప్పదు.