లక్కీ ప్లేస్ కి షిఫ్ట్ అవుతున్న పవన్

సినిమా ఇండస్ట్రీలో సెంటిమెంట్స్ చాలానే ఉంటాయనే సంగతి తెలిసిందే. అన్నీ వర్కవుట్ అయిపోతాయని కాదు కానీ.. వీలైనంత వరకూ వాటిని పాటించడానికే చూస్తుంటారు. రాయలసీమకు సంబంధించిన సన్నివేశాల చిత్రీకరణకు పొలాచ్చి అనువు కావడంతో.. ఇక్కడ చాలానే తెలుగు సినిమాలు షూట్ జరుపుకుంటూ ఉంటాయి. తమిళనాడులోని పొలాచ్చిలో షూటింగ్ చేయడంలో.. పవన్ కళ్యాణ్ కు సెంటిమెంట్ ఉంది.

గబ్బర్ సింగ్.. అత్తారింటికి దారేది చిత్రాలు ఇక్కడ షూటింగ్ జరుపుకోగా.. రెండూ బ్లాక్ బస్టర్స్ గా నిలిచిన సంగతి తెలిసిందే. ఇప్పుడు షూటింగ్ జరుపుకుంటున్న పవన్ కొత్త చిత్రం కాటమరాయుడును కూడా ఇక్కడ షూటింగ్ జరపాలని నిర్ణయించారట యూనిట్ వర్గాలు. వచ్చే వారం బయల్దేరి పొలాచ్చి బయల్దేరనున్నట్లు తెలుస్తోంది. ఇక్కడ రెండు వారాల పాటు నాన్ స్టాప్ గా పిక్చరైజ్ చేసేలా షూటింగ్ ప్లాన్ చేసినట్లు తెలుస్తోంది. కాటమరాయుడులో పవర్ స్టార్ ఫ్యాక్షనిస్ట్ గా నటిస్తుండగా.. ఈ ఫ్యాక్షనిజంకు సంబంధించిన సన్నివేశాలు.. కొన్ని విలేజ్ బేస్డ్ గా నడిచే సీన్స్ ను పొలాచ్చిలో తీయబోతున్నారట.

శృతిహాసన్ ఈ సినిమాలో హీరోయిన్ గా నటిస్తుండగా.. వచ్చే ఏడాది మార్చ్ 29న ఉగాది సందర్భంగా కాటమరాయుడును విడుదల చేయబోతున్నారు.