మేనల్లుడికి పవన్ బొకే విషెస్

సుప్రీమ్ హీరోగా పేరు తెచ్చుకుని ఆ తర్వాత ఆరు వరస డిజాస్టర్లతో కెరీర్ ని డిఫెన్స్ పడేసుకున్న సాయి తేజ్ ఎట్టకేలకు తన పేరు మధ్యలో ధరమ్ ని లేపేసి కొంచెం రిలీఫ్ ఇచ్చే సక్సెస్ అయితే అందుకున్నట్టు చిత్రలహరి వసూళ్ల రిపోర్ట్స్ చెబుతున్నాయి. రెండు రోజుల క్రితం మెగాస్టార్ చిరంజీవి దీని గురించి మాట్లాడుతూ ఓ చిన్న వీడియో మెసేజ్ విడుదల చేసిన సంగతి తెలిసిందే. అందులో తనకు నచ్చిన అంశాల గురించి చిరు మాట్లాడుతూ మేనల్లుడిని టీమ్ ని పొగడ్తలతో ముంచెత్తారు. ఇది తన కాంపౌండ్ హీరోలకు సాధారణంగా చిరు చేసే ప్రాక్టీసే కాబట్టి మాములే అనుకోవచ్చు.

తాజాగా తేజు అమ్మానాన్నతో సమానంగా ప్రేమించే మావయ్య పవన్ కళ్యాణ్ చిత్రలహరి గురించి రెస్పాండ్ అయ్యాడు. వ్యక్తిగతంగా తన తరఫున అభినందనలు తెలుపుతూ ప్రత్యేకంగా పూల బొకేలు పంపాడు. అందులో చిన్న మెసేజ్ కూడా ఇంగ్లీష్ లో జోడించాడు. ప్రియమైన సర్ కు మీ పనిని నేను చాలా ఆస్వాదించాను అని అర్థం వచ్చేలా అందులో పేర్కొన్నారు. ప్రత్యేకంగా తేజును కానీ దర్శకుడు కిషోర్ తిరుమల అని కానీ అందులో ప్రస్తావించలేదు. ఇది తేజుకి వచ్చినట్టే భావించాలి.

పవన్ నిన్న హైదరాబాద్ లో చిత్రలహరి స్పెషల్ షో చూశాడని అందుకే ఇప్పుడిది పంపాడని టాక్ ఉంది. ఒకవేళ అదే నిజమైతే షో తాలూకు పిక్స్ ని షేర్ చేస్తే ఇంకా వైరల్ అయ్యే ఛాన్స్ ఉండేది. నిజంగా పవన్ సినిమా చూసాడా లేక మేనల్లుడికి ప్రోత్సాహంగా ఉంటుందని ఇలా వచ్చిన రిపోర్ట్స్ ని బట్టి బొకే పంపించాడా అనేది తెలియాల్సి ఉంది. మొత్తానికి బ్లాక్ బస్టర్ రేంజ్ కాదు కానీ ఓ మోస్తరుగా తనకు కాస్త ధైర్యాన్నిచ్చే ఫలితాన్ని అయితే తేజు అందుకున్నాడు