మీనింగ్.. టైమింగ్.. ప‌వ‌న్ పంచ్ డైలాగ్‌

ఇంకో ఐదు రోజులే ఉన్నాయి మ‌ధ్య‌లో. ఆరో రోజు ప‌వ‌ర్ స్టార్ ప్ర‌కంప‌న‌లు మొద‌లైపోతాయి. ‘సర్దార్ గ‌బ్బ‌ర్ సింగ్’ విడుద‌ల‌కు స‌మ‌యం ద‌గ్గ‌ర ప‌డుతోంది. ప‌వ‌ర్ స్టార్ మేనియా అప్పుడే మొద‌లైపోయింది. అభిమానుల్లో ఉత్సాహం ప‌ర‌వ‌ళ్లు తొక్కుతోంది. ఆ ఉత్సాహాన్ని మ‌రింత పెంచేలా ప్ర‌మోష‌న్ల‌తో మోతెక్కించాల‌ని చూస్తోంది స‌ర్దార్ టీమ్. ఇప్ప‌టికే టీవీల్లో టైటిల్ సాంగ్ తో యాడ్స్ కుమ్మేస్తున్నారు. ఇప్పుడు లేటెస్టుగా మ‌రికొన్ని కొత్త ప్రోమోలు రిలీజ్ చేసింది స‌ర్దార్ టీమ్. ఇందులో ఒక‌టి రొమాంటిక్-కామెడీ ప్రోమో అయితే.. ఇంకోటి యాక్ష‌న్ ప్రోమో.

ఒక‌దాంట్లో ప‌వ‌న్ అల్ల‌రి వేషాలు.. కాజ‌ల్ గ్లామ‌ర్ హైలైట్ అవుతుంటే.. ఇంకోదాంట్లో ప‌వ‌ర్ స్టార్ యాక్ష‌న్ మోడ్ లో ద‌ర్శ‌న‌మిస్తున్నాడు. ‘మనం ఇచ్చే ప్రతి కౌంటర్‌కి ఓ మీనింగ్‌ ఉంటది, చేసే ప్రతి ఎన్‌కౌంటర్‌కి టైమింగ్ ఉంటుందిరా’ అంటూ ప‌వ‌న్ చెప్పే పంచ్ డైలాగ్ ఈ ప్రోమోకు హైలైట్. విక్ర‌మార్కుడు విల‌న్ వినీత్ కుమార్ ఈ ప్రోమోలో రౌడీ నాయ‌కుడిగా క‌నిపిస్తున్నాడు. ప‌వ‌న్ గ‌న్ లోడ్ చేస్తూ త‌న‌దైన టైమింగ్ తో ఈ డైలాగ్ చెప్పాడు. సినిమాలో ప‌వ‌న్ ఇంట్ర‌డ‌క్ష‌న్ సీన్లో ఈ స‌న్నివేశం.. డైలాగ్ వ‌స్తాయ‌ట‌. విడుద‌ల‌కు ముందు ఇలాంటి షార్ట్ ప్రోమోలు మ‌రిన్ని రిలీజ్ చేయ‌బోతోంది స‌ర్దార్ టీమ్‌.