‘సర్దార్..’ లేటెస్ట్ ఫొటో, అప్ డేట్

ఓ పక్క నిర్మాత శరత్ మరార్ అప్పుడప్పుడూ ట్విట్టర్లోకి వచ్చి ‘సర్దార్ గబ్బర్ సింగ్’ అప్ డేట్స్ ఇస్తున్నా.. రిలీజ్ డేట్ గురించి కన్ఫమ్ చేస్తున్నా జనాల్లో అనుమానాలు మాత్రం తొలగిపోలేదు. అనుకున్నట్లే ఏప్రిల్ 8న ‘సర్దార్ గబ్బర్ సింగ్’ రిలీజవుతుందా లేదా అని ఇప్పటికీ అనుమానంగానే ఉన్నారు పవన్ అభిమానులు. అందులోనూ కొన్ని రోజులుగా శరత్ కూడా సైలెంటుగా ఉండటం.. రిలీజ్ డేట్ కు ఇంకో నెల రోజులు మాత్రమే మిగిలుండగా.. ఇప్పటికీ షూటింగ్ పూర్తయిన దాఖలాలేమీ కనిపించకపోవడంతో ‘సర్దార్’ విడుదల తేదీ విషయంలో అనుమానాలు పెరుగుతున్నాయి.

ఇలాంటి టైంలో పవన్ అభిమానుల్లో ఉత్సాహం నింపే అప్ డేట్ తో ట్విట్టర్ లోకి రీఎంట్రీ ఇచ్చాడు శరత్ మరార్. నిన్న అర్ధరాత్రి దాటాకా ‘సర్దార్ గబ్బర్ సింగ్’ సెట్ లోని ఒక ఫొటోను ట్విట్టర్ లో షేర్ చేశాడు శరత్. పవన్ వైట్ షర్ట్ - గాగుల్స్ తో కుర్చీలో కూర్చుని వెనక్కి తిరిగి పోజిస్తుంటే.. అతడి ముందు కింద కూర్చుని కానిస్టేబుల్ డ్రెస్సుల్లో కెమెరా వైపు చూస్తున్నారు ఆలీ - బ్రహ్మాజీ - వేణు - షకలక శంకర్ తదితరులు. ‘‘సర్దార్ గబ్బర్ సింగ్, అతడి కానిస్టేబుళ్లు కలిసి ఏప్రిల్ 8న బ్లాక్ బస్టర్ రిలీజ్ కోసం శాయశక్తులా కష్టపడుతున్నారు’’ అంటూ ఈ ఫొటోకు కామెంట్ కూడా జోడించాడు శరత్. కాబట్టి పవర్ స్టార్ ఫ్యాన్స్ ఏప్రిల్ 8 మీదే ఆశలు పెట్టుకోవచ్చన్నమాట.