పవన్ కొత్త లుక్ లేదు.. టైటిల్ లోగో మాత్రమే

పవన్ కళ్యాణ్-త్రివిక్రమ్ సినిమా ఈ ఏడాది ఆరంభంలో మొదలైంది. ఇంకో రెండు నెలల్లో సినిమా రిలీజ్ కూడా కాబోతోంది. కానీ ఇప్పటిదాకా ఈ సినిమా టైటిల్ ప్రకటించలేదు. ఆరు నెలలుగా ఈ సినిమా టైటిల్ గురించి దాగుడు మూతలు నడుస్తూనే ఉన్నాయి. చివరగా ‘అజ్నాతవాసి’ అనే టైటిల్ తెరమీదికి వచ్చింది. ఇదే టైటిల్‌ను చిత్ర నిర్మాణ సంస్థ రిజిస్టర్ చేయించడంతో అనధికారికంగా ఈ టైటిలే కన్ఫమ్ అయిపోయింది. కానీ శంఖంలో పోస్తేనే తీర్థం అన్నట్లుగా అధికారికంగా ప్రకటించేస్తే ఓ పనైపోతుందని అందరూ ఎదురు చూస్తున్నారు. ఐతే ఈ ప్రకటన విషయంలోనూ నాన్చుడు ధోరణిలో వెళ్తున్న చిత్ర బృందం ఎట్టకేలకు టైటిల్ అనౌన్స్‌మెంట్‌కు ముహూర్తం చూసుకుంది.

నవంబరు 7న ఈ చిత్ర దర్శకుడు త్రివిక్రమ్ శ్రీనివాస్ పుట్టిన రోజు సందర్భంగా టైటిల్ ప్రకటించబోతున్నట్లు అధికారిక సమాచారం బయటికి వచ్చింది. ‘అజ్నాతవాసి’ టైటిల్ విషయంలో ఎవరికీ అనుమానాలేమీ లేవు. కాకపోతే ఈ టైటిల్‌ లోగోను ఎలా డిజైన్ చేశారన్న ఆసక్తితో ఎదురు చూస్తున్నారు. ఆ రోజు పవన్ కొత్త లుక్ కూడా బయటికి వస్తుందని ప్రచారం జరిగింది కానీ.. అదేమీ ఉండదట. కేవలం టైటిల్ లోగో మాత్రమే చూపిస్తారట. ఈ లోగో స్పెషల్‌ గా డిజైన్ చేసినట్లు చెబుతున్నారు. ప్రస్తుతం ‘అజ్నాతవాసి’ చిత్ర బృందం యూరప్‌ లో పర్యటిస్తోంది. అక్కడ పాటలతో పాటు కొన్ని సన్నివేశాలు కూడా చిత్రీకరించనున్నారు. నవంబరు నెలాఖరుకు షూటింగ్ పూర్తి చేసి.. అనుకున్నట్లే జనవరి 10న సినిమాను రిలీజ్ చేయాలన్నది ప్లాన్.