ఔను.. రవితేజ కోసం పవన్ వస్తున్నాడు

మాస్ రాజా రవితేజ కొత్త సినిమా ‘నేల టిక్కెట్టు’ ఆడియో వేడుకకు పవర్ స్టార్ పవన్ కళ్యాణ్ ముఖ్య అతిథిగా రాబోతున్నాడంటూ కొన్ని రోజులుగా ప్రచారం జరుగుతున్న సంగతి తెలిసిందే. తర్వాత ఇది ఒక రూమర్ అని కొట్టి పారేసింది చిత్ర బృందం. కానీ ఈ వార్తే నిజమని తేలింది. ఈ నెల 10న జరగబోయే ‘నేల టిక్కెట్టు’ ఆడియో వేడుకకు పవన్ చీఫ్ గెస్ట్ గా రాబోతున్నట్లు ఈ చిత్ర నిర్మాత రామ్ తాళ్లూరి స్వయంగా వెల్లడించాడు. ఇంకా ఆడియో వేడుక వేదిక ఏంటన్నది ఖరారు కాలేదు. రేపో ఎల్లుండే ఆ సంగతి వెల్లడవుతుంది.

రవితేజ మెగాస్టార్ కుటుంబానికి సన్నిహితుడు. ముఖ్యంగా చిరంజీవిని చాలా అభిమానిస్తాడు. అతడి కెరీర్ ఎదుగుదలకు చిరంజీవి సాయం చేశాడు కూడా. ఐతే పవన్ కళ్యాణ్ తో మాస్ రాజాకు అంత అనుబంధం ఉన్నట్లుగా తెలియదు. వీళ్లిద్దరూ కలిసి ఓ వేడుకలో కనిపించిన దాఖలాలు లేవు. మరి ఇప్పుడు రవితేజ చిత్ర ఆడియో వేడుకకు పవన్ రాబోతుండటం ఆసక్తి రేకెత్తిస్తోంది. మరి రవితేజ పిలిస్తేనే పవన్ వస్తున్నాడా లేక నిర్మాతో దర్శకుడో పిలిచారో తెలియదు. సినిమాలకు టాటా చెప్పేసి రాజకీయాలకు పరిమితం అయిపోయిన పవన్.. ఈ మధ్య తన నిర్మాణంలో వచ్చిననితిన్ సినిమా ‘చల్ మోహన్ రంగ’ ప్రి రిలీజ్ ఈవెంట్ కు.. చరణ్ మూవీ ‘రంగస్థలం’ విజయోత్సవ సభకు హాజరయ్యాడు. ఇప్పుడు తనకే సంబంధం లేని మాస్ రాజా సినిమా ఆడియో వేడుకకు రాబోతుండటం ఆశ్చర్యం కలిగించే విషయమే. మరి అక్కడ రవితేజ గురించి పవన్.. పవన్ గురించి రవితేజ ఏమంటారో చూడాలి.