ప‌వ‌న్-త్రివిక్ర‌మ్ సినిమా ఫ‌స్ట్ లుక్!

సినిమా మొద‌లై వారం కూడా అవ్వ‌లేదు. ఇంకా టైటిల్ కూడా అనుకోలేదు. అప్పుడే ఫ‌స్ట్ లుక్ ఏంటి అని ఆశ్చ‌ర్య‌పోకండి. ఇక్క‌డ మాట్లాడుతోంది అఫీషియ‌ల్ ఫ‌స్ట్ లుక్ గురించి కాదు. ప‌వ‌ర్ స్టార్ అభిమానులు త‌మ క్రియేటివిటీ చూపిస్తూ తీర్చిదిద్దిన అన‌ధికారిక ఫ‌స్ట్ లుక్ గురించి. ఇది అఫీషియ‌ల్ లుక్ కాదు అని ఎవ‌రైనా చెబితే త‌ప్ప జ‌నాలు న‌మ్మేసేంత‌గా అదిరిపోయేలా ఈ ఫ్యాన్ మేడ్ పోస్ట‌ర్ రెడీ జ‌నాల్ని ఆక‌ర్షిస్తోంది సోష‌ల్ మీడియాలో. త్రివిక్ర‌మ్ ఇంకా ఈ సినిమాకు పేరేమీ ప్ర‌క‌టించ‌క‌పోయినా.. అభిమానులు మాత్రం ‘ఇంజినీర్ బాబు’ అనే టైటిల్ కూడా ఫిక్స్ చేసేసి పోస్ట‌ర్ రెడీ చేసేశారు.

ఈ మ‌ధ్యే విడుద‌లైన ‘కాట‌మ‌రాయుడు’లోని ప‌వ‌న్ స్టిల్ ఒక‌టి తీసుకుని దాన్నే కొత్త పోస్ట‌ర్ కోసం వాడుకున్నారు. త్రివిక్ర‌మ్ సినిమాలో ప‌వ‌న్ సాఫ్ట్ వేర్ ఇంజినీర్ పాత్ర‌ను పోషిస్తున్న‌ట్లు వార్త‌లొస్తున్న నేప‌థ్యంలో ఈ సినిమాకు ‘ఇంజినీర్ బాబు’ అనే టైటిల్ పెట్టేశారు అభిమానులు. దీనికి ‘ఇంటిపేరు ఒంటిపేరు అంతా ఇదే’ అనే ఆస‌క్తిక‌ర ట్యాగ్ లైన్ కూడా జోడించ‌డం విశేషం. పీకే 25వ సినిమా అంటూ స్టాంప్ కూడా వేయ‌డం.. పోస్ట‌ర్ అందంగా.. స్టైలిష్ గా తీర్చిదిద్ద‌డంతో స‌డెన్ గా చూస్తే ఇది ఒరిజిన‌ల్ ఫ‌స్ట్ లుక్ పోస్ట‌రేమో అని జ‌నాలు భ్ర‌మ‌ప‌డే అవ‌కాశ‌ముంది. ప్ర‌స్తుతం ఈ పోస్ట‌ర్ సోష‌ల్ మీడియాలో వైర‌ల్ అవుతోంది.