మరోసారి తెరమీదకు బ్లాక్ బస్టర్ కాంబో..!

ఇటీవలే వకీల్ సాబ్ సినిమాతో భారీ సక్సెస్ అందుకున్నాడు డైరెక్టర్ వేణుశ్రీరామ్. కెరీర్ పరంగా ఫస్ట్ టైం వకీల్ సాబ్ తో మాస్సివ్ సక్సెస్ ఖాతాలో వేసుకున్నాడు. ప్రస్తుతం సక్సెస్ ఫీల్ ఎంజాయ్ చేస్తున్నాడు. ఇదే ఆనందంలో వేణుకు మరో బంపర్ ఆఫర్ లభించిందని టాక్. వకీల్ సాబ్ సినిమాతో పవర్ స్టార్ పవన్ కళ్యాణ్ బ్లాక్ బస్టర్ రీఎంట్రీ ఇచ్చాడు. దాదాపు మూడేళ్లు విరామం తర్వాత ప్రేక్షకుల ముందుకు వచ్చేసరికి వారు భారీ సక్సెస్ ముట్టజెప్పారు. నిర్మాత దిల్ రాజు కూడా భారీ లాభాలను వెనకేసుకున్నట్లు తెలుస్తుంది. ఇదిలా ఉండగా.. వేణుశ్రీరామ్ - పవన్ కళ్యాణ్ - దిల్ రాజు ఈ కాంబినేషన్ అనగానే వకీల్ సాబ్ గుర్తొస్తుంది.

అయితే త్వరలోనే ఈ సూపర్ హిట్ కాంబినేషన్ మరో సినిమాకు శ్రీకారం చుడతారని వార్తలు వినిపిస్తున్నాయి. తాజా సమాచారం ప్రకారం.. దిల్ రాజు డైరెక్టర్ వేణుశ్రీరామ్ తో పవన్ కళ్యాణ్ కోసం మరో స్టోరీ సిద్ధం చేయమని చెప్పాడట. అందుకోసం ప్రస్తుతం వేణు కూడా తమ అభిమాన హీరో పవన్ కళ్యాణ్ ఇమేజ్ దృష్టిలో పెట్టుకొని ఓ స్టోరీ లైన్ రెడీ చేసాడట. త్వరలోనే అది పవన్ కళ్యాణ్ కు వినిపించనున్నట్లు ఇండస్ట్రీలో టాక్ నడుస్తుంది. వేణుతో పాటు దిల్ రాజు మరి కొంతమంది దర్శకులకు కూడా స్టోరీస్ సిద్ధం చేయాలనీ చెప్పినట్లు తెలుస్తుంది. ఏ స్టోరీ అనేది చివరికి పవన్ కళ్యాణ్ ఓకే చేస్తారట. మరి ఈ లెక్కన వకీల్ సాబ్ కాంబినేషన్ మరో సినిమాకు తెరలేపనున్నారెమో చూడాలి. ప్రస్తుతం పవన్ హరిహర వీరమల్లు, ఏకే రీమేక్ సినిమాలు చేస్తున్నాడు.