బిగ్ బితో మెగా పవర్స్

సినిమా షూటింగ్స్ లో జరిగే కొన్ని స్పెషల్ మూమెంట్స్ అప్పటికప్పుడు బయటికి రాకపోవచ్చు కానీ ఏదో ఒక రోజు తెలిసినప్పుడు మాత్రం టైంతో సంబంధం లేకుండా వైరల్ అవుతూ ఉంటాయి. అలాంటిదే ఇక్కడి పిక్ కూడా. చిరంజీవితో ఎన్నో బ్లాక్ బస్టర్ సినిమాలకు రచయితగా చేసిన సత్యానంద్ ఈ రోజు తన ఫేస్ బుక్ లో పోస్ట్ చేసిన పిక్ మెగా అభిమానుల మధ్య విపరీతంగా చక్కర్లు కొడుతోంది. దానికి కారణం ఫోటోలోనే తెలిసిపోతుంది. మెగాస్టార్ తో పవర్ స్టార్ ఉంటేనే అభిమానులకు చూసేందుకు రెండు కళ్ళు చాలవు. అలాంటిది అందులో వీరితో పాటు మెగా పవర్ స్టార్ ఉంటే ఇక చెప్పేదేముంది. ఇందులో ప్రత్యేకత ఇక్కడితో ఆగిపోలేదు. ఇండియన్ సూపర్ స్టార్ బిగ్ బి అమితాబ్ బచ్చన్ కూడా ఉండటం మరింత ఆకర్షణను జోడించింది. చిరు అమితాబ్ తమ సైరా పాత్రలకు సంబందించిన గెటప్స్ లో ఉండగా పవన్ కళ్యాణ్ క్లీన్ షేవ్ తో చక్కగా ఉన్నాడు.

ఇది సుమారు రెండు మూడు నెలల క్రితం తీసుకున్న ఫోటోగా అర్థమవుతోంది. సత్యానంద్ కు ప్రత్యేకంగా చిరు దీన్ని ఫ్రేమ్ చేయించి మరీ పంపారట. ఇన్ని రోజుల తర్వాత దీన్ని షేర్ చేసుకున్నా ఆన్ లైన్ లో ఇది హల్చల్ చేస్తోందంటే మెగా క్రేజ్ ఎంతుందో దీన్ని బట్టి అర్థం చేసుకోవచ్చు. సైరా టీజర్ విడుదల అయ్యాక అంచనాలు అమాంతం పెరిగిపోయాయి. షూటింగ్ ఫుల్ స్వింగ్ లో ఉంది. ఈ టైం లో ఈ పిక్ చూసి అందుకే ఫాన్స్ పండగ చేసుకుంటున్నారు. జనసేన కార్యకలాపాల్లో బిజీగా అయ్యాక పూర్తి గెడ్డంతోనే కనిపిస్తున్న పవన్ ఈ ఫోటోలో క్లీన్ షేవ్ తో కనిపించడం విశేషం. షూటింగ్ స్పాట్ లో బిగ్ బి అమితాబ్ ఉండటం చాలా అరుదైన సందర్భం కాబట్టి చిరు ప్రత్యేకంగా చరణ్ ను పవన్ ని పిలిపించి మరీ ఈ ఫోటో దిగినట్టు అర్థమవుతోంది. మొత్తానికి మంచి జ్ఞాపకాన్ని షేర్ చేసినందుకు సత్యానంద్ గారి కామెంట్స్ బాక్స్ థాంక్స్ తో నిండిపోయింది.