వర్మ ట్వీట్.. లోకేశ్ తో కలిపి పీకేను కెలికేసినట్టేనా?

సంచలన దర్శకుడు రాంగోపాల్ వర్మ... రాజకీయాల్లోకి రాకుండానే... సినిమాలతోనే ఏపీ పాలిటిక్స్ లో హీట్ పెంచేస్తున్నారు. ఇప్పటికే మొన్నటి ఎన్నికలకు కాస్తంత ముందుగా లక్ష్మీస్ ఎన్టీఆర్ పేరిట దివంగత సీఎం ఎన్టీఆర్ బయోపిక్ తీస్తున్నానని చెప్పిన వర్మ... ఆ సినిమాలో టీడీపీ అధినేత నారా చంద్రబాబునాయుడును భారీగానే టార్గెట్ చేశారు. తాజాగా ఎన్నికల్లో వైసీపీ విజయం సాధించడంతో మరోమారు టీడీపీని టార్గెట్ చేసిన వర్మ...‘కమ్మరాజ్యంలో కడప రెడ్లు’ పేరిట ఓ చిత్రాన్ని తెరకెక్కిస్తున్నారు. ఈ సినిమాలో కూడా చంద్రబాబే టార్గెట్ అనుకున్నా... అంతకుమించిన టార్గెట్లు ఉన్నాయంటూ వర్మ తాజాగా సంచలన ప్రకటన చేశారు. తన తాజా సినిమాలో చంద్రబాబుతో పాటు ఆయన కుమారుడు నారా లోకేశ్, జనసేనాని పవన్ కల్యాణ్ కూడా ఉండనున్నట్లుగా వర్మ ట్వీట్ వెల్లడించేసింది.

తన తాజా ట్వీట్ లో ఓ ఫొటోను పోస్ట్ చేసిన వర్మ... సదరు ఫొటోలో ఉన్న ఇద్దరు వ్యక్తులు ఎవరో కనుక్కోగలరా? అంటూ ఓ ప్రశ్నను సంధించడంతో పాటుగా వారిద్దరిని గుర్తించిన వారికి బహుమతి కూడా ఇస్తానంటూ వర్మ ఆసక్తికర వ్యాఖ్యలు చేశారు. ఈ ఫొటోలోని రెండు పాత్రలు కూడా కమ్మరాజ్యంలో కడప రెడ్లు చిత్రంలోనివేనని కూడా చెప్పేసిన వర్మ... ఆ ఇద్దరూ పవన్ కల్యాణ్, నారా లోకేశ్ లేనని చెప్పకనే చెప్పేశారు. ఇక సదరు ట్వీట్ లో ఇంకో ఫొటోనుకూడా పోస్ట్ చేసిన వర్మ... పవన్ ను తన సినిమాలో ఎలా చూపించనున్నానన్న విషయాన్ని కూడా దాదాపుగా తేల్చేసినట్లుగానే చెప్పాలి.

సదరు ఫొటోలో పవన్ ఏదో రాజకీయ ప్రసంగం చేస్తుండగా... ఆయన చుట్టూ నలుగురైదుగురు అమ్మాయిలు నిలబడినట్టుగా, వారి పక్కనే జనసేన నేతలు, సెక్యూరిటీ గార్డులు నిలబడినట్టుగా ఉన్న సదరు ఫొటో... వర్మ సినిమాలో పవన్ కేరెక్టర్ ఏమిటన్న విషయంపైనా ఆసక్తి రేకెత్తించిందని కూడా చెప్పక తప్పదు. ఇప్పటికే మూడు పెళ్లిళ్లు చేసుకున్న పవన్ పై పెద్ద ఎత్తున విమర్శలు రేకెత్తాయి. ఇదే విషయాన్ని ప్రస్తావించిన పలువురు రాజకీయ నేతలు, సినీ ఇండస్ట్రీకి చెందిన వారు పవన్ కేరెక్టర్ ను కడిగిపారేసిన సందర్భాలు కూడా మనకు తెలిసిందే. ఆ విమర్శలను బేస్ చేసుకునే వర్మ కూడా పవన్ కేరెక్టర్ ను అలాగే ప్రొజెక్ట్ చేసే అవకాశాలు లేకపోలేదన్న వాదన వినిపిస్తోంది. అయితే పవన్ ను ఎవరేమన్నా... చాలా వేగంగా రియాక్ట్ అవడంతో పాటుగా ఎదురుదాడికి దిగే ఆయన అభిమానులు... ఇప్పుడు వర్మ పోస్ట్ చేసిన ట్వీట్ ను చూసి ఏమంటారో కూడా చూడాలి. మొత్తంగా సింగిల్ ట్వీట్ తో వర్మ... పవన్ ఫ్యాన్స్ కే కాకుండా మొత్తంగా ఏపీలో హీట్ ను పెంచేశారని చెప్పక తప్పదు. ఇదిలా ఉంటే... తన తాజా చిత్రం కమ్మరాజ్యంలో కడప రెడ్లు చిత్ర ట్రైలర్ ను దీపావళిని పురస్కరించుకుని ఈ నెల 27న ఉదయం 9.36 గంటలకు విడుదల చేయనున్నట్లు కూడా వర్మ ప్రకటించారు.