పవన్ రెండు మల్టీస్టారర్స్ ఆ హీరోలతోనే ఎందుకంటే..!

టాలీవుడ్ లో ఇటీవల కాలంలో మల్టీస్టారర్ చిత్రాలు ఊపందుకుంటున్నాయి. ఇద్దరు స్టార్ హీరోలు సైతం ఒకే ఫ్రేమ్ లో కనిపించడానికి ఆసక్తి చూపిస్తున్నారు. ఈ చిత్రాలకు అటు ప్రేక్షకులు కూడా బ్రహ్మరథం పడుతూ వస్తున్నారు. అందుకే స్టార్ హీరోలు ఇమేజ్ అని.. స్టార్ డమ్ అని.. ఫ్యాన్స్ అభిప్రాయాలు అని ఏమీ పట్టించుకోకుండా ఇతర స్టార్ హీరోలతో స్క్రీన్ షేర్ చేసుకోడానికి ముందుకు వస్తున్నారు. పవర్ స్టార్ పవన్ కళ్యాణ్ కూడా మల్టీస్టారర్స్ చేయడానికి వెనకాడలేదు. సీనియర్ హీరో విక్టరీ వెంకటేష్ తో కలిసి 'గోపాల గోపాల' సినిమాలో నటించాడు పవన్. ఇప్పుడు మరో మల్టీస్టారర్ ని స్టార్ట్ చేసిన పవన్.. ఈసారి మరో దగ్గుబాటి హీరో రానా తో కలిసి నటించనున్నాడు.

మలయాళంలో సూపర్ హిట్ అయిన 'అయ్యప్పనుమ్ కోశీయుమ్' తెలుగు రీమేక్ లో పవన్ కళ్యాణ్ - రానా కలిసి నటిస్తున్న సంగతి తెలిసిందే. సాగర్ కె.చంద్ర ఈ చిత్రానికి దర్శకత్వం వహించనున్నాడు. అక్కడ బిజూ మీనన్ పోషించిన నిజాయితీ గల పవర్ ఫుల్ పోలీస్‌ ఆఫీసర్ పాత్రలో పవన్‌ కనిపించనుండగా.. పృథ్వీరాజ్ పోషించిన పాత్రలో రానా నటిస్తాడు. నిజానికి సితార ఎంటర్టైన్మెంట్స్ వారు ఈ సినిమా రీమేక్ రైట్స్ తీసుకున్నప్పటి నుంచి అనేక మంది హీరోల పేర్లు తెరపైకి వచ్చాయి. రానాని ముందే ఒక పాత్రలో అనుకున్నప్పటికి.. మరో పాత్రలో బాలయ్య - రవితేజ వంటి పేర్లు వినిపించాయి. అయితే అనూహ్యంగా ఈ ప్రాజెక్ట్ లో పవన్ - రానా సెట్ అయ్యారు. పవర్ స్టార్ తో రెండు మల్టీస్టారర్స్ లో నటించే అవకాశం దగ్గుబాటి హీరోలకే దక్కడం గమనార్హం. వారి మధ్య ఉన్న బాండింగే దీనికి కారణమని తెలుస్తోంది. మరి 'ఏకే' రీమేక్ తెలుగులో సక్సెస్ సాధించి పవర్ స్టార్ - దగ్గుబాటి హీరోల బాండింగ్ మరింత స్ట్రాంగ్ గా మారుస్తుందేమో చూడాలి.