మహేష్ కు పోటీగా బరిలో దిగనున్న పవన్ - ప్రభాస్ - తారక్..?

టాలీవుడ్ లో 'సంక్రాంతి పండుగ' అంటే సినిమా పండుగ. హీరోలు దర్శకనిర్మాతలు ఆ సీజన్ లో సినిమాలు రిలీజ్ చేయడానికి పోటీ పడుతుంటారు. ఇక అప్పుడు విడుదలయ్యే స్టార్ హీరోల సినిమాలపై అంచనాలు ఏ రేంజ్ లో ఉంటాయో ప్రత్యేకంగా చెప్పక్కర్లేదు. ఈ నేపథ్యంలో 2022 సంక్రాంతి బెర్త్ కోసం అప్పుడే కర్చీఫ్ వేస్తున్నారు. దీంతో వచ్చే పండుగకు బాక్సాఫీస్ వద్ద స్టార్ హీరోల మధ్య పోటీ ఎక్కువగా ఉండే అవకాశం ఉందని నిపుణులు చెబుతున్నారు.

సూపర్‌ స్టార్‌ మహేశ్‌ బాబు - డైరెక్టర్ పరశురామ్‌ కాంబినేషన్‌ తెరకెక్కుతున్న ''సర్కారు వారి పాట'' చిత్రాన్ని 2022 సంక్రాంతికి విడుదల చేయనున్నట్లు ఇప్పటికే ప్రకటించారు. 14 రీల్స్ ప్లస్ - మైత్రీ మూవీ మేకర్స్ - జీఎంబీ ఎంటర్‌టైన్‌మెంట్ సంస్థలు కలిసి ఈ చిత్రాన్ని నిర్మిస్తున్నాయి. గతేడాది 'సరిలేరు నీకెవ్వరు' సినిమాతో బ్లాక్‌ బస్టర్‌ విజయాన్ని తన ఖాతాలో వేసుకున్న మహేష్.. వచ్చే పండుగకు ఈ యాక్షన్ ఎంటర్టైనర్ తో ఇండస్ట్రీ హిట్‌ అందుకుంటారని అభిమానులు ధీమాగా ఉన్నారు.

ప్రస్తుతం లైన్ లో ఉన్న స్టార్ హీరోల సినిమాలను బట్టి చూస్తే మహేష్ కి పోటీగా యంగ్ రెబల్ స్టార్ ప్రభాస్ - పవర్ స్టార్ పవన్ కళ్యాణ్ - యంగ్ టైగర్ ఎన్టీఆర్ దిగే అవకాశాలు కనిపిస్తున్నాయని అంటున్నారు. ప్రభాస్ - 'కేజీఎఫ్' ఫేమ్ ప్రశాంత్ నీల్ కాంబినేషన్ లో రూపొందుతున్న ''సలార్'' షూటింగ్ జరుపుకుంటోంది. హోంబలే ఫిలింస్ బ్యానర్ పై విజయ్‌ కిరగందూర్‌ భారీ బడ్జెట్ తో ఈ యాక్షన్ ఎంటర్టైనర్ ని నిర్మిస్తున్నారు. ప్రభాస్ నటిస్తున్న 'రాధే శ్యామ్' జులైలో విడుదల అవుతున్న నేపథ్యంలో 'సలార్' సంక్రాంతికి వచ్చే ఛాన్స్ ఉంది.

‌పవన్‌ కల్యాణ్‌ - క్రిష్‌ జాగర్లమూడి దర్శకత్వంలో రూపుదిద్దుకుంటోన్న సినిమా కూడా ఫెస్టివల్ సీజన్ నే టార్గెట్ చేయనుందని టాక్. 'అయ్యప్పనుమ్ కొశీయుమ్' తెలుగు రీమేక్ ఈ ఏడాదే ప్రేక్షకుల ముందుకు రానున్న నేపథ్యంలో పవన్ నటిస్తున్న పీరియాడికల్ ఫిల్మ్ సంక్రాంతికి రావాలని ఫ్యాన్స్ కోరుకుంటున్నారు. మహాశివరాత్రి పర్వదినాన్ని పురస్కరించుకుని ఈ సినిమా టైటిల్‌ - ఫస్ట్‌ లుక్‌ వదలనున్నారు. అప్పుడే విడుదలపై కూడా క్లారిటీ ఇస్తారేమో చూడాలి.

అలానే ఎన్టీఆర్ - త్రివిక్రమ్ శ్రీనివాస్ కాంబినేషన్ లో తెరకెక్కనున్న సినిమాని మే నెలలో స్టార్ట్ చేస్తారని వార్తలు వస్తున్నాయి. హాసిని అండ్ హారిక ఎంటరైన్మెంట్స్ - ఎన్టీఆర్ ఆర్ట్స్ కలిసి ఈ చిత్రాన్ని నిర్మించనున్నాయి. 'ఆర్.ఆర్.ఆర్' షూట్ పూర్తైన వెంటనే తారక్ డేట్స్ అన్నీ ఈ ప్రాజెక్ట్ కే కేటాయించనున్నాడు. వీలైనంత త్వరగా ఈ సినిమా షూటింగ్ చేసి సంక్రాంతి బరిలో నిలిపే ఛాన్సెస్ ఉన్నాయి. ఇదే కనుక జరిగి వచ్చే ఏడాది సంక్రాంతికి 'సర్కారు వారి..'కి పోటీగా ఈ మూడు సినిమాలు వస్తే.. బాక్సాఫీస్ వద్ద నలుగురు స్టార్ హీరోల మధ్య రసవత్తరమైన పోటీ ఏర్పడుతుందని చెప్పవచ్చు.