ఉస్తాద్ ప్రీప్రొడక్ష‌న్.. హ‌రీష్‌లో జోష్ చూశారా?

చాలా కాలంగా వేచి చూస్తున్న అరుదైన‌ త‌రుణ‌మిది. ఇలాంటి ఒక మంచి మాట చెబుతాడ‌ని హ‌రీష్ శంక‌ర్ వైపు ప‌వ‌ర్ స్టార్ ఫ్యాన్స్ చూస్తూనే ఉన్నారు. కానీ అత‌డు ఏదీ చెప్ప‌డం లేదు. ప్రాజెక్ట్ ఉంటుంది! అంటూ హింట్ ఇచ్చాడే కానీ క‌న్ఫామ్ గా ఏదీ చెప్ప‌క‌పోయేస‌రికి సందిగ్ధంలో ప‌డ్డారు. ఇప్ప‌ట్లో హ‌రీష్ తో ప‌వ‌న్ సినిమా ఉంటుందా ఉండ‌దా? ఈ లోగా నెక్ట్స్ ఎన్నిక‌లొచ్చేస్తాయి క‌దా? అప్పుడు జ‌న‌సేనానికి తీరిక ఎక్క‌డ ఉంటుంది? అంటూ చాలా మంది సందేహాలు లేవ‌నెత్తారు.

అయితే అన్ని సందేహాలకు చెక్ పెడుతూ ఇప్పుడు అధికారికంగా సినిమాని ప్రారంభించేందుకు చ‌క‌చ‌కా ఏర్పాట్లు సాగుతున్నాయి. తాజాగా #ఉస్తాద్ భ‌గ‌త్ సింగ్ ప్రీ-ప్రొడక్షన్ శరవేగంగా జరుగుతోంది.. అంటూ క‌బురు అందించారు హ‌రీష్ అండ్ టీమ్ స‌భ్యులు. త్వరలో షూటింగ్ ప్రారంభమవుతుంది.

ఆ మేర‌కు మైత్రి మూవీ మేక‌ర్స్ అధికారికంగా ట్విట్ట‌ర్ లో ఓ ఫోటోని షేర్ చేసి వివ‌రాలు వెల్ల‌డించింది. ఈ ఫోటోగ్రాఫ్ లో త‌న టీమ్ తో డిస్క‌స్ చేస్తూ హ‌రీష్ చాలా జోష్ లో క‌నిపిస్తున్నాడు. ప‌వ‌న్ స్నేహితుడు ఆర్ట్ డైరెక్ట‌ర్ ఆనంద్ సాయి.. తో క‌లిసి స్క్రిప్టుకి అనువైన‌ సెట్స్ వ‌గైరా అంశాల‌ను కాన్సెప్టువ‌లైజ్ చేస్తున్నారు. ఈ సినిమాని భారీ కాన్వాస్ పై తెర‌కెక్కించేందుకు టీమ్ ప్రిప‌రేష‌న్ లో ఉంది.

టైటిల్ కి త‌గ్గ‌ట్టు మాంచి మాస్ మ‌సాలా యాక్ష‌న్ సినిమాకి దేశ‌భ‌క్తిని జోడించి ఈ సినిమాని హ‌రీష్ తెర‌కెక్కిస్తాడా? లేక‌పోతే పాన్ ఇండియా ట్రెండ్ ని దృష్టిలో ఉంచుకుని యూనివ‌ర్శ‌ల్ యాక్సెప్టెన్సీ ఉన్న యూనిక్ కంటెంట్ ని ఎంచుకున్నాడా? అన్న‌దానికి స‌మాధానం రావాల్సి ఉంది. ఈ చిత్రానికి రాక్ స్టార్ దేవీశ్రీ ప్ర‌సాద్ సంగీతం అందించ‌నున్నారు.

శివ‌కార్తికేయ‌న్ తో ఉన్న‌ట్టా? లేన‌ట్టా?

త‌మిళ హీరో శివ‌కార్తికేయ‌న్ హీరోగా హరీష్ శంకర్- దిల్ రాజు కాంబినేష‌న్ లో ఓ సినిమా చేసేందుకు చర్చలు సాగుతున్నాయ‌ని ఇటీవ‌ల క‌థ‌నాలొచ్చాయి. అయితే నిజ‌మా? అన్న‌ది ఆరా తీస్తే ఆ ప్రాజెక్ట్ కి ఇప్ప‌ట్లో అవ‌కాశం లేద‌ని తెలిసింది. శివకార్తికేయన్ ప్రస్తుతం `మావీరన్` విడుదల కోసం ఎదురుచూస్తున్నాడు. మరోవైపు దిల్ రాజు వార‌సుడు (వరిసు) ప్రమోషన్స్ లో బిజీగా ఉన్నారు. దిల్ రాజు - హరీష్ శంకర్ లతో శివకార్తికేయన్ సినిమా చేయడం లేదని.. అవ‌న్నీ క‌ల్పిత క‌థ‌నాలు అని ఓ సోర్స్ ఖండించిన‌ట్టు తెలిసింది.


నోట్ : మీ ఫీడ్ బ్యాక్ మాకు ముఖ్యం. క్రింద కామెంట్ బాక్స్ లో కామెంట్ చేయండి. మా కంటెంట్ నచ్చినా చెప్పండి. నచ్చకపోయినా చెప్పండి. హుందాగా స్పందించండి. abuse వద్దు.