`మేజ‌ర్` ని మెచ్చిన జ‌న‌సేనాని

ఉగ్ర దాడుల్లో అమ‌రుడైన సందీప్ ఉన్నికృష్ణ‌న్ జీవిత క‌థ ఆధారంగా తెర‌కెక్కిన `మేజ‌ర్` ఇటీవ‌ల రిలీజ్ అయి ఎలాంటి విజ‌యం సాధించిందో తెలిసిందే. సందీప్ పాత్ర‌లో అడ‌వి శేషు ఒదిగిపోయిన వైనం..ద‌ర్శ‌కుడు శిషి కిర‌ణ్ తిక్క మేకింగ్ మేజ‌ర్ ని ప‌తాక స్థాయిలో నిల‌బెట్టాయి. దేశం గ‌ర్వించే చిత్రంగా మేజ‌ర్ నిలిచింది. క‌మ‌ర్శియ‌ల్ స‌క్సెస్ తో పాటు సినిమాలో న‌టించిన ప్ర‌తీ న‌టుడికి ప్ర‌త్యేక‌మైన గుర్తింపు ద‌క్కింది.

తాజాగా ఈ చిత్రాన్ని జ‌న‌సేన అధినేత ప‌వ‌న్ క‌ళ్యాణ్ మెచ్చారు. ఈ సంద‌ర్భంగా ప‌వ‌న్ క‌ళ్యాణ్ `మేజ‌ర్` చిత్ర బృందాన్ని అభినందిస్తూ ఓ లేఖ విడుద‌ల చేసారు. ``ముంబై మహానగరంలో 26 నవంబర్ 2008న ఉగ్రవాదులు చేసిన ఘాతుకాలను 26/11 మారణ హోమంగా ఈ దేశం గుర్తుపెట్టుకొంది. నాడు చేసిన కమెండో ఆపరేషన్ లో మేజర్ సందీప్ ఉన్నికృష్ణన్ సాహసాలు.. ఆయన వీర మరణాన్ని వెండి తెరపై `మేజర్ ` గా ఆవిష్కరించిన చిత్ర బృందానికి మనస్ఫూర్తిగా అభినందనలు తెలియచేస్తున్నాను.

ఈ చిత్రానికి ప్రేక్షకుల నుంచి వ‌స్తోన్న‌ స్పందన తెలుసుకొని ఎంతో సంతోషించాను. అన్ని భాషల వారినీ మెప్పిస్తున్న ఈ బయోపిక్ మన తెలుగు చిత్రసీమ నుంచి రావడం ఆనందం కలిగించింది. మేజర్ సందీప్ ఉన్నికృష్ణన్ లాంటి సైనికాధికారులు.. సిబ్బంది దేశ భద్రత కోసం ఎంతగా పోరాడుతున్నారో అందరికీ తెలియాలి. పార్టీ సంబంధిత వ్యవహారాల్లో తలమునకలై ఉండటంతో `మేజర్` ఇంకా చూడలేదు. ఆ చిత్రానికి వస్తున్న స్పందన తెలుసుకొన్నాను.

త్వరలోనే ఆ చిత్రం వీక్షిస్తాను. ఈ చిత్ర కథానాయకుడు సోదరుడు అడివి శేష్ గారికి హృదయపూర్వక అభినందనలు. ప్రఖ్యాత రచయిత దివంగత శ్రీ అడివి బాపిరాజు గారి మనవడైన శ్రీ శేష్ సినిమాలో భిన్న శాఖలపై అభినవేశం ఉన్న సృజనశీలి. తెలుగు సాహిత్యంపై మక్కువ... వర్తమాన అంశాలపై ఉన్న అవగాహన ఆయన మాటల్లో తెలుస్తుంది.

ఇటువంటివారు మరింత మంది చిత్రసీమకు రావాలి. ఒక సాహసి కథను చలన చిత్రంగా మలచిన చిత్ర దర్శకుడు శ్రీ శశికిరణ్ కు శుభాకాంక్షలు. ఇటువంటి మంచి చిత్రాలు ఆయన నుంచి మరిన్ని రావాలని ఆకాంక్షిస్తున్నాను` అని లేఖ‌లో పేర్కొన్నారు.

`మేజర్` చిత్ర నిర్మాణంలో భాగస్వామి అయిన ప్రముఖ హీరో శ్రీ మహేశ్ బాబు గారికి.. చిత్ర నిర్మాతలు శ్రీ శరత్ చంద్ర,శ్రీ అనురాగ్ రెడ్డిలకు నా అభినందనలు. ఈ చిత్రంలో నటించిన శ్రీ ప్రకాష్ రాజ్.. శ్రీమతి రేవతి.. సాయి మంజ్రేకర్.. శోభిత ధూళిపాళ.. మురళీ శర్మలకు.. చిత్ర సాంకేతిక నిపుణులకు ప్రత్యేక అభినందనలు ప‌వ‌న్ తెలియ‌జేసారు. ప‌వ‌న్ లేఖ ఇప్పుడు నెట్టింట వైర‌ల్ గా మారింది.

ప‌వ‌న్ ప్ర‌శంస‌తో `మేజ‌ర్` చిత్రాన్ని ప్రేక్ష‌కులంతా చూడాలని సోషల్ మీడియా వేదిక‌గా జ‌న‌సైనుకులు..అభిమానులు పిలుపునిస్తున్నారు. ఇలాంటి చిత్రాలు చాలా అరుదుగా మాత్ర‌మే వ‌స్తాయ‌ని..వాటిని ప్రేక్ష‌కులంతా త‌ప్ప‌క చూడాల‌ని కోరుతున్నారు. మొత్తానికి ప‌వ‌న్ లేఖ `మేజ‌ర్` చిత్రానికి అద‌నంగా ప్ర‌చారం తీస‌కొస్తుంద‌ని చెప్పొచ్చు.