ఎన్టీఆర్ సినిమా కోసం పర్ఫెక్ట్ షూటింగ్ ప్లాన్..?

యంగ్ టైగర్ ఎన్టీఆర్ 'ఆర్.ఆర్.ఆర్' చిత్రంతో బిగ్గెస్ట్ బ్లాక్ బస్టర్ అందుకోవడమే కాదు.. సరికొత్త పాన్ ఇండియా స్టార్ గా అవతరించారు. ఈ జోష్ లో వెంటనే తన తదుపరి చిత్రాన్ని సెట్స్ మీదకు తీసుకెళ్లాలని అభిమానులు కోరుకుంటున్నారు.

జూనియర్ ఎన్టీఆర్ తన నెక్స్ట్ మూవీని కొరటాల శివ దర్శకత్వంలో చేయనున్న సంగతి తెలిసిందే. ఇది తారక్ కెరీర్ లో మైలురాయి 30వ చిత్రం. #NTR30 అనే వర్కింగ్ టైటిల్ తో పిలవబడుతున్న ఈ సినిమాపై భారీ అంచనాలు పెట్టుకున్నారు.

ఈ నేపథ్యంలో ఇటీవల 'ఫ్యూరీ ఆఫ్ NTR30' పేరుతో వచ్చిన మోషన్ పోస్టర్ & ప్రీ లుక్ విశేషంగా ఆకట్టుకున్నాయి. ఎప్పుడెప్పుడా ఈ సినిమాని బిగ్ స్క్రీన్ పై చూడాలా అనే ఉత్సుకతను రెట్టింపు చేసింది.

'జనతా గ్యారేజ్' కాంబోలో ఎన్టీఆర్ 30 ప్రాజెక్ట్ కు సంబంధించిన అధికారిక ప్రకటన వచ్చి ఏడాది గడుస్తున్నా.. షూటింగ్ మాత్రం ఇంకా మొదలు కాలేదు. ఈ చిత్రాన్ని జూన్ లేదా జూలైలో సెట్స్ పైకి తీసుకెళ్లాలని మేకర్స్ ప్లాన్ చేసినట్లు ఈమధ్య వార్తలు వచ్చాయి.

అయితే రెగ్యులర్ షూటింగ్ ప్రారంభం కావడానికి ఇంకాస్త జాప్యం జరుగనుందని అంటున్నారు. ఆగస్ట్ నెలలో ఎన్టీఆర్ - కొరటాల ప్రాజెక్ట్ ని షురూ చేస్తారని టాక్ నడుస్తోంది. మేకర్స్ దీని కోసం ఇప్పటికే ముందస్తు షూటింగ్ ప్లాన్ కూడా రెడీ చేశారని చెబుతున్నారు

ఎన్టీఆర్30 షూటింగ్ ని ఆగస్టులో ప్రారంభించి 6-7 నెలల్లో మొత్తం చిత్రీకరణను ముగించాలనే విధంగా మేకర్స్ ప్లాన్ చేస్తున్నారట. ఇదే నిజమైతే 2023 మొదటి త్రైమాసికంలో షూటింగ్ పూర్తవుతుంది. వచ్చే సమ్మర్ లో థియేటర్లలో విడుదల చేయడానికి సిద్ధంగా ఉంటుంది.

కొరటాల ప్రస్తుతం ఈ ప్రాజెక్ట్ కి సంబంధించి నటీనటులను ఖరారు చేసే పనిలో ఉన్నారు. ఈ చిత్రానికి అనిరుధ్ రవిచంద్రన్ సంగీతం సమకూరుస్తున్నారు. రత్నవేలు సినిమాటోగ్రఫీ అందిస్తుండగా.. సాబు సిరిల్ ప్రొడక్షన్ డిజైనింగ్ చేస్తున్నారు. శ్రీకర్ ప్రసాద్ ఎడిటింగ్ బాధ్యతలు చూసుకుంటారు.

ఎన్టీఆర్ ఆర్ట్స్ (నందమూరి కళ్యాణ్ రామ్) సమర్పణలో యువసుధ ఆర్ట్స్ బ్యానర్ పై మిక్కిలినేని సుధాకర్ - కొసరాజు హరికృష్ణ సంయుక్తంగా భారీ బడ్జెట్ తో ఈ చిత్రాన్ని నిర్మించనున్నారు. ఇదొక పాన్ ఇండియా ప్రాజెక్ట్. తెలుగు తమిళ మలయాళ కన్నడ హిందీ భాషల్లో రిలీజ్ అవుతుంది.