షూటింగ్స్ మొద‌లుపెట్టినా ఇబ్బందులు మాత్రం తప్పడంలేదు...!

కరోనా వైరస్ కారణంగా ఏర్పడిన పరిస్థితుల నేపథ్యంలో చిత్ర పరిశ్రమలో అనేక మార్పులు చోటు చేసుకుంటున్నాయి. సినిమా షూటింగ్ దగ్గర నుంచి రిలీజ్ వేదిక వరకు అన్ని విషయాల్లో కొత్త పద్ధతులు వస్తున్నాయి. ఒకప్పుడు సినిమాలు థియేటర్స్ లో విడుదల అవుతుంటే.. ఇప్పుడు డైరెక్ట్ ఓటీటీలలో రిలీజ్ అవుతున్నాయి. ఇంతకముందు సినిమా రిలీజ్ కు ముందు ఉండే హంగామా అంతా ఇప్పుడు లేకుండా పోయింది. ప్రీ రిలీజ్ ఈవెంట్స్.. సక్సెస్ మీట్స్ అంటూ జరిగే సినిమా ఈవెంట్స్ అన్నీ ఆన్లైన్ లో జరుపుకుంటున్నారు. ఇక సినిమా షూటింగ్స్ లో కూడా సమూల మార్పులు కనిపిస్తున్నాయి. ఒకప్పుడు షూటింగ్ లొకేషన్ లో నటీనటులు సిబ్బందితో సందడి సందడిగా ఉండేది. అయితే ఇప్పుడు మాత్రం కోవిడ్ కారణంగా కొద్ది మాత్రమే కనిపిస్తున్నారు. అందులోనూ షూటింగ్ స్పాట్ లో ఉండే వారందరూ మాస్కులు శానిటైజర్స్ వంటి సేఫ్టీ మెజర్స్ పాటించాల్సి వస్తోంది.

గత కొన్ని నెలలుగా నిలిచిపోయిన సినిమా షూటింగ్స్ అన్నీ తిరిగి ప్రారంభం అవుతున్నాయి. అందరూ సెట్స్ లో కోవిడ్ నిబంధనలు పాటిస్తూ చిత్రీకరణ చేస్తున్నారు. అయితే షూటింగ్స్ మొద‌లుపెట్టినా చిత్రీకరణ జరుపుకోడానికి చాలా ఇబ్బందులు ప‌డుతున్నారని తెలుస్తోంది. ఆర్టిస్టులుకి కూడా తిప్పులు త‌ప్ప‌డం లేద‌ని టాక్. సెట్స్ లో ఉన్నంతసేపు మాస్క్ పెట్టుకునే ఉండటం.. షాట్ కి షాట్ కి మాస్కులు తీయడం పెట్టుకోవ‌డం చేస్తూ ఉండటం.. మ‌ళ్లీ మళ్ళీ మేక‌ప్ ట‌చప్స్ చేయించుకోవలసి రావడం.. ఇలా అనేక ఇబ్బందులు పడుతున్నారట. కోవిడ్ నిబంధ‌న‌లు పాటిస్తూ పెర్ఫార్మెన్స్ చేయ‌డం మరింత ఇబ్బందిగా ఉంటోందని కొందరు హీరోలు వాపోతున్నారట. దీనికి తోడు కరోనా వస్తుందేమో అనే భ‌యంతో వ‌ర్క్ మీద కాన్స‌న్ట్రేట్ చేయ‌లేక‌పోతున్నామ‌ని అంటున్నారట. అయితే కరోనా నేపథ్యంలో ఈ జాగ్రత్తలు తీసుకోకపోతే మొదటికే మోసం వస్తుందనే విషయం కూడా గుర్తుంచుకోవాలని మరికొందరు కామెంట్స్ చేస్తున్నారని తెలుస్తోంది. ఏదేమైనా మహమ్మారికి వ్యాక్సిన్ వచ్చే వరకు నటీనటులకు ఈ ఇబ్బందులు తప్పేలా కనిపించడం లేదు.