మహేష్ సినిమాకు ‘మోడీ’ బ్రేక్

వంశీ పైడిపల్లి దర్శకత్వంలో మహేష్ బాబు కొత్త సినిమా కోసం గత ఏడాది నుంచి ప్రి ప్రొడక్షన్ వర్క్ జురుగుతోంది. చాన్నాళ్ల కిందటే స్క్రిప్టు పూర్తి చేసి.. మిగతా సన్నాహాల్లో బిజీగా ఉన్నాడు వంశీ. మరి కొన్ని రోజుల్లోనే షూటింగ్ మొదలుపెట్టాల్సి ఉండటంతో నిర్మాతలు కూడా షెడ్యూళ్లు పక్కాగా ప్లాన్ చేసే పనిలో ఉన్నారు. ముందుగా డెహ్రాడూన్ లో ఈ చిత్ర తొలి షెడ్యూల్ మొదలు కావాల్సి ఉంది. అందుకోసం సన్నాహాల్లో ఉన్న చిత్ర బృందానికి షాక్ తగిలింది. ఆ సిటీలో షూటింగ్ కు ప్రభుత్వ అనుమతి లభించలేదు. ఇందుకు ప్రధాన మంత్రి నరేంద్ర మోడీనే పరోక్ష కారణం కావడం గమనార్హం. ఈ నెల 21న ప్రపంచ యోగా దినోత్సవం సందర్భంగా మోడీ డెహ్రాడూన్ లో పర్యటించబోతున్నారు. ప్రధాని పర్యటన అంటే కొన్ని రోజుల ముందు నుంచే సన్నాహాలు జరుగుతాయి. దీంతో అక్కడ షూటింగ్ చేయడానికి వీలు లేకపోయింది.

మహేష్ చిత్ర బృందం ఈ నెల 10 నుంచి 25 వరకు చిత్రీకరణ కోసం అనుమతి కోరగా.. అక్కడి అధికారులు కుదరదని తేల్చేశారట. డెహ్రాడూన్ లోని ఒక కళాశాలలో వందల మందితో చిత్రీకరణ చేయాల్సి ఉండటంతో భద్రత కల్పించడం కష్టమని.. అది ప్రధాని పర్యటనకు కూడా ఇబ్బందికరంగా మారుతుందని స్థానిక అధికారులు తేల్చిచెప్పినట్లు సమాచారం. దీంతో ముందు వేరే ప్రాంతంలో షూటింగ్ చేసుకుని.. ప్రధాని పర్యటన ముగిసిన తర్వాత డెహ్రాడూన్ వద్దామని ప్లాన్ మార్చుకునే ప్రయత్నంలో ఉందట చిత్ర బృందం. మహేష్ సరసన పూజా హెగ్డే నటించబోయే ఈ చిత్రాన్ని అగ్ర నిర్మాతలు దిల్ రాజు.. అశ్వినీదత్ నిర్మించబోతున్నారు. దేవిశ్రీ ప్రసాద్ సంగీత దర్శకుడు. ఈ చిత్రంలో మహేష్ గడ్డంతో కొత్తగా కనిపించబోతున్నట్లు సమాచారం.