పిక్ టాక్: సల్లూ భాయ్ తో మెగాస్టార్ స్టెప్పులు..!

మెగాస్టార్ చిరంజీవి నటిస్తున్న 153వ చిత్రం ''గాడ్‌ ఫాదర్''. మోహన్ రాజా దర్శకత్వంలో తెరకెక్కుతున్న ఈ సినిమా షూటింగ్ చివరి దశకు చేరుకుంది. అయితే మెగా అభిమానులు ఎంతగానో ఎదురుచూస్తున్న ఈ చిత్రం నుంచి ఓ ఆసక్తికరమైన అప్డేట్ వచ్చింది.

'గాడ్‌ ఫాదర్' సినిమాలో బాలీవుడ్ స్టార్ హీరో సల్మాన్ ఖాన్ కీలక పాత్ర పోషిస్తున్న సంగతి తెలిసిందే. ఇది కండల వీరుడికి తెలుగు డెబ్యూ. ఇందులో చిరు - సల్మాన్ లపై ఓ స్పెషల్ సాంగ్ కూడా ఉన్నట్లు చిత్ర బృందం ఇప్పటికే క్లారిటీ ఇచ్చింది.

ఈ నేపథ్యంలో తాజాగా మెగాస్టార్ ఈ పాట గురించి ట్వీట్ చేశారు. ''గాడ్ ఫాదర్ సినిమా కోసం సల్మాన్‌ ఖాన్‌ భాయ్ తో కాలు కదుపుతున్నాను. ప్రభుదేవా బెస్ట్ కొరియోగ్రఫీ చేశారు. ఇది ఖచ్చితంగా ప్రేక్షకులకు కన్నుల పండుగగా ఉంటుంది'' అని చిరు పేర్కొన్నారు.

ఈ సందర్భంగా సాంగ్ కు సంబంధించిన ఓ ఫోటోని బాస్ షేర్ చేశారు. ఇందులో స్టైల్ గా నడుస్తున్న చిరంజీవి - సల్మాన్ ఖాన్ ల బ్యాక్ సైడ్ లుక్ ని చూడొచ్చు. స్పెషల్ సెట్ లో షూట్ చేస్తున్న ఈ పాటలో చిరు షూట్ ధరించి ఉండగా.. సల్లూ భాయ్ ఎప్పటిలాగే టక్ చేసి కనిపించారు. బ్యాగ్రౌండ్ లో ఫిమేల్ డ్యాన్సర్స్ ని కూడా గమనించవచ్చు.

మ్యూజిక్ సెన్సేషన్ ఎస్ఎస్ థమన్ ఈ డ్యాన్స్ నంబర్ కు అదిరిపోయే ట్యూన్ కంపోజ్ చేసినట్లు సమాచారం. ఇండియన్ మైఖేల్ జాక్సన్ ప్రభుదేవా ఇద్దరు సీనియర్ హీరోలను దృష్టిలో పెట్టుకొని.. వారికి సరిపోయే విధంగా కొరియోగ్రఫీ చేశారని తెలుస్తోంది.

'గాడ్ ఫాదర్' ఒక హై ఇంటెన్స్ పొలిటికల్ యాక్షన్ థ్రిల్లర్. మలయాళంలో ఘనవిజయం సాధించిన 'లూసిఫర్' చిత్రానికి రీమేక్ గా తెరకెక్కుతోంది. రీమేక్‌ అయినప్పటికీ చిరంజీవి ఇమేజ్ కి తగ్గట్టుగా.. తెలుగు సెన్సిబులిటీస్ ని దృష్టిలో పెట్టుకొని పలు మార్పులు చేర్పులు చేసినట్లు తెలుస్తోంది.

ఇప్పటికే విడుదలైన ఫస్ట్ లుక్ మోషన్ పోస్టర్ లో మెగాస్టార్ లుక్ ఫ్యాన్స్ ని విపరీతంగా ఆకట్టుకుంది. మాతృకలో డైరెక్టర్ పృథ్వీరాజ్ సుకుమారన్ పోషించిన షార్ప్ షూటర్ పాత్రలో సల్మాన్ ఖాన్ కనిపించనున్నారు. ఇందులో నయనతార - సత్యదేవ్ - సునీల్ ఇతర ముఖ్య పాత్రలు పోషిస్తున్నారు.

'గాడ్ ఫాదర్' చిత్రాన్ని కొణిదెల ప్రొడక్షన్స్ సురేఖ సమర్పణలో సూపర్ గుడ్ ఫిలింస్ బ్యానర్ పై ఆర్‌బి చౌదరి - ఎన్‌వి ప్రసాద్‌ లు సంయుక్తంగా నిర్మిస్తున్నారు. నీరవ్ షా సినిమాటోగ్రఫీ నిర్వహిస్తుండగా.. సురేష్ సెల్వరాజన్ ఆర్ట్ డైరెక్టర్ గా వర్క్ చేస్తున్నారు.

విజయదశమి కానుకగా ఈ ఏడాది అక్టోబర్ లో 'గాడ్ ఫాదర్' సినిమా ప్రపంచ వ్యాప్తంగా విడుదల కాబోతోంది. 'ఆచార్య' వంటి డిజాస్టర్ తర్వాత రాబోతున్న ఈ మూవీ కచ్చితంగా మెగాస్టార్ స్టామినా ఏంటో బాక్సాఫీస్ కు చూపిస్తుందని అభిమానులు నమ్ముతున్నారు.